Siriako herritarren egoera gero eta larriagoa da. Atzo, Gurutze Gorriaren Nazioarteko Batzordeko presidenteak, Peter Maurerrek, egoerari ezin diotela aurre egin ohartarazi zuen. «Laguntza eskaerari erantzun ezinik gabiltza. Egoera humanitarioak nabarmen okerrera egin du gatazka armatuaren ondorioz. Eta gure lanak areagotu ditugun arren, ez da nahikoa. Ez dugu gaitasunik herritarren beharrak asetzeko, horiek handiagoak baitira. Ezin dugu gatazkaren abiadurarekin eta larritasunarekin», plazaratu zuen. Hori dela-eta, gero eta pertsona gehiagok ez dute laguntzarik jasotzen.

Horrez gain, Gurutze Gorriak arazo ugari ditu hainbat lekutan sartzeko. Maurerrek gogorarazi zuenez, oraindik ezin izan dira Gobernuak airez erasotako hiri gehienetan sartu. «Ez dakigu zer nolako giroa topatuko dugun. Badakigu laguntza ez dela toki askotara iritsi, baina ez ditugu datu zehatzak. Hori dela-eta, ez dakigu zenbat zauritu egongo diren, zer motako jakiak behar dituzten edo zein osasun balditzatan dauden. Itsu-itsuan goaz», helarazi zuen.

Duela egun gutxi, Homsen sartzea lortu zuten, baina bi orduz bakarrik.

Siriako Mediku Laguntzako Erakundeen Batasuneko bozeramaile Tawfik Chamaak asteazkenean nabarmendu zuenez, «hondamendi baten atarian gaude. Negua gainean daukagu eta herritar ugari isiltasunean hilko dira. Gaixorik dauden ehunka pertsona hiltzen ari dira, horien artean, diabetesa, minbizia edo tentsioa altua dutenak, baita dialisia egitea beharrezkoa dutenak ere, edo garaia baino lehenago jaio diren haurrak eta haurdun dauden emakume asko. Bakar-bakarrik hiltzen ari dira beren etxeetan laguntza ezagatik eta ezin direlako inora jo laguntza eske», salatu zuen mediku siriarrak.

Bere hitzetan, «gaixorik edo zauriturik egotea, norbait sendatzea eta botikak leku batetik bestera eramatea krimena bihurtu da Sirian. Ez dago babeslekurik. Zaurituak eta horiek sendatzen dituztenak terroristak direla dio Gobernuak eta segurtasun indarrek hil egiten dituzte, torturatu ondoren».