Bere baserriaren izena hartu zuen Inazio Bastida Uranga Etxeberritxo-k. Panderoa jotzen bere kasa hasi bazen ere, ibilbide oparoa osatu zuen hainbat trikitilariren alboan. Euskal Herriko Trikitixa elkarteak atzo eman zuen haren heriotzaren berri.

1979an Euskadiko Trikitixa Txapelketako finalerdietara iritsi zen Epelarrerekin eta azken urte hauetan zehar, soinujole andanarekin aritu izan zen; Epelarrerekin bezala, Astiasaran anaiekin edota azkenaldian, Xabi Solano musikariarekin ere bai. Esne Zopak proiektuan izan zuten partaide eta zenbait zuzenekotan ere eurekin izan zen oholtza gainean.

«Etxeberritxorentzat, bizipoz iturrietako bat izan da trikitixa eta panderoa, eta hala transmititu izan du oholtza gainean zein afari giroan ere», azaldu zuten elkartekoek. «Soinu hotsa entzun orduko, piztu egiten zen gizona. Bere pandero mugimendu bereziarekin, berehala alaitzen zituen inguruko guztiak».

Bere aldeko hileta elizkizuna, gaur izango da, 19.00etan, Azpeitiko Soreasuko Sebastian Donearen Parrokian.