Azken hiru hamarkadetako zinema europarraren egile garrantzitsuenetakoa den zuzendari serbiarraren «When day breaks» filmak zabalduko du datorren apirilaren 19an Victoria Eugenia antzokian Giza Eskubideen Zinemaldia. Holokaustoaren biktimen oroimenaren gaineko filma da. 2010ean, Goran Paskaljeviçen «Honeymoons» filmak irabazi zuen Zinemaldiko saria.

Sail ofizialeko zenbait lanen izenburuak jakinarazi zituen jaialdiak atzo. Bertako hiru film ikusi ahal izango dira, horietatik bi estreinaldiak eta, gainera, Gipuzkoan filmatutakoak: «Alardearen seme-alabak» da horietako bat, Jone Karres eta Eneko Olasagastik zuzendua, eta gure artean soka luzea duen gaia jorratzen du, Irun eta Hondarribiko alardeetako parte-hartzeari buruzko dokumentala baita. Bestea, Jorge Gil Munarrizek estreinatuko duen «El método Arrieta» filma da. Eta zertan datza metodo hori? «Lourdes eta Mentxu Arrieta ahizpek begiradaren bidez elkar ulertzen dute. Eta, kasu honetan, adierazpen hori ezin hobea da: gorputzeko mugimenduak kontrolatzeko arazo batek elbarri utzi ondoren, begien mugimenduaren bidez airean letrak idatziz elkar komunikatzen dira», dio filmaren sinopsiak.

Hirugarren euskal filma «Argonautas» izenekoa da. Juan Dopicoren diziplina anitzeko proiektu bat da, eta pertsonen eta natura-ingurunearen arteko harremanak birformulatzen dituzten ekimenak, prozesuak, diseinuak eta bizimoduak ikertzen ditu.

Sail ofizialean ikusi ahal izango diren nazioarteko filmei dagokienez, «Le cochon de Gaza» filmean, Sylvain Estibalek sinatzen duen tragikomedian, Gazako arrantzale palestinar batek zerri bat topatuko du bere sarean eta animalia zikina berehala ondotik kentzea erabakiko du.

Ameriketako Estatu Batuetatik dator «The House I Live In». Eugene Jarecki dokumentalistak «Drogen aurkako gerra» deiturikoari buruzko lana osatu du. Gerra honek azken hamarkadetan 45 milioi pertsona eraman ditu espetxera, heriotza ugari eragin eta familiak suntsitu ditu.

Basilio Martin Patino salamancarrak «Libre te quiero» ekarriko du Donostiara. Oraingoan, estilo berri bat hautatu du, inpresionista eta dokumental hutsa lortzeko ahaleginetatik hurbil dagoena. Filma Puerta del Solen dauden manifestariak elkartzeko unean abiatzen da.

Alemania, 1945. urtea. Amaitu da gerra. Ume talde batek suntsitutako herrialdea zeharkatzeko asmoa du, 900 kilometro iparraldera bizi den amonarekin elkartzeko asmoz. Horrela hasten da «Lore», Cate Shortlandek zuzendutako ekoizpen australiar-alemaniarra.

Eta azken titulua «Parada / The Parade» filma, non Srojan Dragojeviç serbiarrak lesbiana, gay, bisexual eta transexualen kolektiboen eskubideak jorratzen dituen.