«Herrittik herrixandako» sortutako espazioa da Oñatiko txosnagunea, umore onaren epizentroetako bat San Migel eta Errosarixo jaietan. Atzo iluntzean Txantxikua elizako kanpandorretik txosnetara jaitsi zen eta justu hamabi ordu geroago, goizeko zortzietan, argazki erraldoia ateratzeko elkartu dira gaupaseroak eta mendizaleak. Gazteenek badute aitzakia gaupasa egiteko, gurasoek ulertuko dute argazkian egon beharra dutela... Tartean, gaueko hamaiketan hasita, danborrada nagusian parte hartu zuten, bigarren urtez beren konpartsarekin eta Oñatiko txarangarekin. Iaz baino lagun gehiago atera ziren, adin guztietakoak. Ia 300era iritsi ziren. Pilota txapelketako finalaurrekoak egin zituzten arratsaldean, eta gaur finalak jokatuko dituzte. Guztiz zabala da lehiaketa hau.

Iñaki Guridi Txosna Batzordeko kideak nabarmendu duenez, eraso sexisten aurkako protokoloa jarri dute martxan aurrenekoz. Bi arduradun daude beti txosnagunearen funtzionamendua zaintzen, eta hauen lana da erasorik egon ez dadin bermatzen saiatzea ere. Baldin badago, hartu beharreko neurriak ezarrita dituzte.

Kutsadura saihesteko lehenengo pausoa berrerabiltzea dela konbentzituta daudenez, zaborra gaika banatzeaz gain, edalontzi berrerabilgarriak banatuko dituzte eta etorriko direnei deialdia egin diete etxean halakorik badute ekartzeko.

Datorren asteburuko jaiei dagokienez, ostiralean laugarren Egun Morea eginen dute, bazkari feministarekin, olinpiadekin, «transmaribollo» kalejirarekin eta karrikaldiarekin. Guridik kontatu duenez, karrikaldian oholtzarik gabe emanen dituzte kontzertuak, lasto fardoen artean, jendea jolasteko. Larunbatean, Herri Egunean, euskal preso politiko eta errefuxiatuei omenaldia eginen diete, eta igandean, paella-jana eskainiko dute. Gaztetxean lo egiteko aukera egonen da eta sukaldean lortutako dirua «Berria»-ri emanen diote.