Surflariek itsasoaren aparraz gozatzen zuten bitartean, metro eskasera, Munoa plazan, itsas bazterrera mezu argia eramateko jende ugari elkartu zen. Hamaiketarako egina zegoen hitzordua eta ordu horren bueltan hasi zen jendea gerturatzen, Euskal Herrian Euskarazek antolatuko ekimenean parte hartzeko. Pixkanaka hasi ziren zenbakiak banatzen eta txikitxo nahiz helduagoek berrehundik gora laguneko zerrenda osatu zuten.

Antolaketa lanak egin zituen Zarauzko Euskal Herrian Euskaraz taldearen oharrei jarraituz abiatu ziren guztiak malekoira, asko oraindik ere ondo zer egin behar zuten ohartu ezinda. Ekimenaren atzean zegoen helburua, ordea, guztiek zuten argi: herritarrekiko tratua nahiz kontratazio publikoak euskaraz egiteak legea urratzen duela argudiatuta, Estatuaren abokatuak Zarauzko Udala auzitara eraman izana ozen salatzea. Izan ere, kostaldeko herriak hizkuntza irizpideak berritu zituen urte hasieran, euskarari lehentasuna emanda, beste hainbat udalerrik bezala.

EHEko Nestor Estebanek adierazi zuenez, Zarautzek nahiz beste herri batzuek emandako pausoak txalogarriak dira eta horregatik horiek goraipatu nahi izan zituzten ekimen honen bitartez. Bide berean, abenduaren erditik aurrera egitasmo berri bat jarriko dutela abian iragarri zuen, «herritarren eta udalen arteko harremanak euskaraz garatu daitezen». Horretarako, tresna desberdinak jarriko dituzte herritarren esku. «Udalek pausoak eman dituzte eta ematen jarrai dezaten nahi dugu, baina, era berean, uste dugu herritarrok ere aktibatu behar dugula euskaraz bizitzeko ahaleginean ekarpena egiteko».

Gogoz eta umoretsu

Atzo behintzat Zarautzen elkartu ziren herritarrek jarrera aktiboa erakutsi zuten, gogoz altxatu zituzten-eta antolatzaileek eman zizkieten kartelak, besoak luze-luze eginda txikienek, eta haien parean jartzeko makurtuta, altuagoek. Guztiek egin zieten aurre itsasoak botatako hordagoari, itsasgora bidean, mingaina luzatu eta bateren bati hankak bustitzera ere iritsi baitzen.

Euskaldundu beharreko alor desberdinak irudikatu zituzten lehenik, eta bertaratutakoak harean irakurri zituzten «justizia», «osasungintza», «hedabideak» eta «hezkuntza» hitzak. Ondoren abiatu ziren lerroka eta antolatzaileen oharrei jarraituz mezu nagusia «idaztera»: «Etxetik Udalera, euskaraz aurrera». Malekoian barrena paseoan zebiltzan lagunek nahiz irudia jaso nahi zuten argazkilariek mezua irakurri zutela egiaztatuta, txalo artean eta umoretsu amaitu zuten ekimena, trikiti doinuekin udaletxera kalejiran abiatu aurretik.