Autodeterminazioan oinarritutako Europa nahi dute Euskal Herriko eragile askok
Herrien eskubideetan eta askatasunean oinarritutako Europa lortzeko autodeterminazio eskubidea ezinbesteko oinarritzat hartu behar dela uste dute Euskal Herriko hainbat eragilek, eta horren aldeko manifestua kaleratu dute. Europako Foro Sozialean parte hartuko dute, eta, gainera, gai horrekin Euskal Herrian eztabaida piztu nahi dute.
DONOSTIA
Europako Itun konstituzionalaren gainean Europan eztabaida berriro piztu da. Batetik, estatuek Ituna berriz indartu nahi dute, eta, bestetik, «ezetza» eman zuten eragileek bestelako Europa eraikitzeko oinarriak finkatzeko elkarlanean ari dira. Horrela, Euskal Herrian Itunaren aurka egin zuten hainbat eragilek manifestua kaleratu zuten atzo helburu zehatz batekin: eraiki nahi den bestelako Europan herriak eta, batez ere, haiek duten autodeterminaziorako eskubidea ezinbesteko oinarritzat onartzea.«Eraiki nahi dugun bestelako Europa hori pertsona eta herrien eskubide eta askatasunean oinarrituta egotea nahi badugu, EuskalHerriak ahotsa izan behar du», nabarmendu zuten orain arte manifestua sinatu duten eragileek. Autodeterminazioaren eta subiranotasunaren eskaera egiteak beste gai sozialetan ere berdintasunean eta errespetuan lan egiteko aukera izatea ahalbidetuko duela adierazi zuten. «Horrexegatik, etorkinak, emakumeak, gazteak, kultura eta hizkuntzak, identitatea, sozioekonomia, hezkuntza eta beste hainbat arloetan ere gure ekarpen xumea egiten dugu», azaldu zuten eragile sinatzaileen ordezkariek. Bestalde, aste honetan Grezian egingo den Europako Foro Sozialean parte hartuko dutela jakinarazi zuten, bertan autodeterminazioan oinarritutako Europa baten beharra mahai gainera ateratzeko. «Gure ahotsa Europako Foro sozialera eraman nahi dugu», azaldu zuten. Gainera, handik jasoko dituzten esperientzia eta iritziekin gai horri buruz Euskal Herrian eztabaida piztu nahi dute. «Indarrak bildu, eta inposatu nahi diguten kapitala eta estatuen Europaren aurrean herrien eta jendartearen Europa eraiki nahi dugu», adierazi zuten.
Manifestuarekin bat egiteko deialdia egin dute sinatzaileek
GARA
DONOSTIA «Beste Europa bat sortzen» izeneko manifestua sinatzeko dei zabala egin zieten sinatzaileek Euskal Herriko eragileei, dokumentuarekin bat egin zezaten. «Bere garaian adostu genuena, bigaren urrats bat emanez, eztabaidaren jarraipena bultzatu nahi dugu eta, eztabaida hau benetakoa izateko, beharrezkoa da denon artean lantzea eta Euskal Herriko eragileek bertan parte hartzea», azaldu zuten sinatzaileek. Gogorarazi zutenez, iaz Europako Itun konstituzionalari, hainbat arrazoirengatik, ezetz esaten ziotenek manifestu bat adostu zuten Euskal Herrian. «Eragile asko elkartuz, eta denon artean ituna hainbat eremutako perspektibatik aztertuz, ezetzaren diskurtsoa garatu genuen. Orain beste pausu bat eman nahi dugu bide horretan», gaineratu zuten.
|
