DONOSTIA

Txapela lortzeko faborito nagusia Ostolatza da adituen ustez, eta harekin batera, Irigoien. Hala ere, Ostolatzak ez du bere burua horren faborito ikusten. «Aimar Irigoienekin kontuz ibili beharko da. Azkeneko erreferentzia Alegiako Torneoa da eta han aurrea hartu zidan. Akaso nik ez nuen egunik onena izan, baina berak sekulako lana egin zuen, eta larunbatean berdin aritzen bada, oso zaila izango da bera gainditzea», esan zen zestoarrak.

Ostolatzak garbi ikusten du txapela bere eta errezildarraren artean egongo dela. «Ezeren okerrik ez dela, uste dut txapelak bion artean egon behar duela», aitortu zuen.

Larunbateko finalak, ordea, bi hutsune nabarmen izango ditu, ez baitira bertan izango ez Izeta III.a, ez eta Izeta II.a ere. «Izeta II.a sasoi betean dago, eta garbi dago bera etorri izan balitz, maila asko igoko zela. Anaiaren falta ere nabarituko da. Harri hauekin oso ongi moldatzen da, eta lehen postuetan ibiliko zen. Hala ere, alde onari ere begiratu behar zaio, eta lehen txapelketa hauetan izaten ez diren izen berri batzuk agertu dira, eta hori ontzat jo behar da», esan zuen.

Aurtengo lehiaketan aldaketa bat ere izango da. Orain arte, 150 kiloko harria beti izaten zen. Nahi zuenak zilindroa edo, bestela, errektangularra erabili ahal zuen. Batak 150ekoa izan behar zuen, eta besteak, 125ekoa, baina aurten harri biek 125 kilokoak izan behar dute. Horren arrazoiak Ostolatzak berak azaldu zituen: «Herrialdeetako txapelketetan jende dezente ateratzen zen, baina Euskal Herrikoan horietako askok huts ematen zuten. Hori ekiditeko, 150 kiloko harria kentzea erabaki zen». Berari, berriz, horrek ez omen dio eraginik egiten. «Egia esan, niri berdintsu zait; kiloak kentzea ez da inoiz txarra izaten», adierazi zuen.

Zestoarrak orain Euskal Herriko Harri Txikien Txapelketa dauka buruan, baina hori amaitutakoan, harri handiena izango du. «Udazken aldera izango da Harri Handien Txapelketa, eta badut hura prestatzeko denbora. Egia esan behar bada, nire aurtengo bi erronkak bi lehiaketa hauek dira. Han ere Aimar izan dezaket kontrario nagusia», esan zuen.

Aurten inoiz baino torneo gehiago dituzte harri-jasotzaileek, eta horrek nekea ekartzen diela ere esan zuen Ostolatzak. «Udan erakustaldiak eta torneoak, denak batera izaten ditugu, eta azkenerako denetara iritsi ezinik ibiltzen gara, baina larunbateko finalerako ongi iritsiko naizelakoan nago», esanda agurtu zen Zestoako harri-jasotzailea.

Larunbatean Lakuntzan jokatuko duten finalerako hiru herrialdek bakarrik izango dute ordezkaritza. Gipuzkoa, Bizkaia eta Nafarroa bertan izango dira, baina gainerako herrialdeetatik ez doa inor. Lapurdin badago harri horientzat egokia den bakarren bat baina ez doa, eta Araban ere batzuk izan arren, handik ere ez doa inor.