- Binakako Txapelketa
Bi liderrak nor baino nor sari arriskutsuaren bila
·Imanol Agirrek aukera polita du Iscarren jokatuko den neurketan
DONOSTIA
Irujo-Goñi eta Agirre-Zearra bikoak Valladolid aldean neurtuko dira gaur, Iscarren, hain zuzen, lehen ligaxkako azken jardunaldiko bigarren norgehiagokan (18.00etan, Tele5). Multzo bakoitzeko liderrak dira eta gaur irabazten duenak ziurtatuta izango du final-laurdenetan beste multzoko azken sailkatuaren aurka jokatzea. Baina teorian ona beharko lukeen horrek ez dakar praktikan horrenbesteko onurarik, litekeena baita Xala-Eulate edo Bengoetxea VI-Patxi Ruiz bikote gogorrak izatea azken sailkatu horiek.
Aimar apurka-apurka
Bestalde, Aimar Olaizola apurka-apurka ari da belaunean duen lesiotik osatzen. Atzo Gasteizen izan zen Iñigo Simon sendagilearekin eta, dirudienez, mantso-mantso bada ere, belauna ongi ari da erantzuten. Euskal Telebistari eginiko adierazpenetan onartu zuenez, oraindik korrika hasi ez bada ere, sendagileak «beste ariketa batzuk egiten hasteko» esan dio belauna indartzeko bide horretan. Txapelketari dagokionez, Aimarrek argi dauka «erabat osatu arte» ez duela jokatuko eta, beraz, oraingoz nahiago duela horretan ez pentsatu.
|
