Euskal preso politikoek jasaten duten salbuespenezko espetxe politika gainditzeko «soluzio positiboak» eskatu zizkion atzo Herrira mugimenduak Gobernu espainolari. Horretarako, giza eskubideak errespetatu eta gaixotasun larriak dituzten presoak askatzeko, sakabanaketa bukatzeko eta bizi osorako zigorra ezarri dieten presoei neurri hori kentzeko eskatu zioten.

Atzokoan, «Aitzol Askatu, 13ak Herrira» lelopean, Herrirako kideek Basurtuko ospitale aurrean egin zuten elkarretaratzea, Aitzol Gogorza euskal preso politikoaren askatasuna aldarrikatzeko; hain zuzen ere, gaixotasun sikiko larria baitu errenteriarrak, nahasmen obsesibo konpultsiboa. Herriraren bozeramaile Beñat Zarrabeitiak jakinarazi zuenez, «Gogorza apirilaren hasieran Sevillako kartzelatik Basauriko kartzelara hurbildu, eta asteazkenean Basurtuko ospitalean sartu zuten, bere osasun egoerak txarrera egin baitzuen».

Bestalde, atzo Bularreko Minbiziaren Nazioarteko Eguna zela-eta, gaixotasun hori duen Gotzone Lopez de Luzuriaga euskal preso politikoaren egoera gogorarazi zuen Zarrabeitiak, eta era berean haren askatasuna ere aldarrikatu. Atzoko elkarretaratzean Herrirako dozena bat kidek hartu zuten parte, baita Bilboko Udaleko Bilduko zinegotzi Txema Azkuenagak ere.

Zarrabeitiak azaldu zuenez, «Espainiako Gobernuak euskal preso politikoek jasaten duten salbuespenezko espetxe politika gainditzeko soluzio positiboak planteatu behar ditu. Hartara, giza eskubideak oinarri, gaixotasun larriak dituzten 13 euskal preso politikoak askatu egin behar ditu». Horren harira, Iosu Uribetxebarriaren kasua gogora ekarri zuen Zarrabeitiak, «zoritxarrez, udan, hiltzeko zorian zegoen pertsona bat askatzeko Espainiako Gobernuaren hamaika oztopo ikusi genituen; horrela guztiok galtzaile ateratzen gara».

Bestalde, biharko hauteskundeei erreparatuta, Zarrabeitiak Lakuako hurrengo gobernuari honakoa eskatu zion, «euskal gizartearen gehiengoari kasu egin eta euskal preso politikoen salbuespen egoerak gainditzeko lan egin dezala».

Irainak eta mehatxuak

Bestalde, Etxeratek atzo jakinarazi zuen Badajozen espetxeratua dagoen Kepa del Hoyo euskal preso politikoak funtzionario baten hainbat irain eta mehatxu jasan behar izan dituela. Horren harira, 2012. urtean hamabi eraso gertatu direla gogorarazi zuten.

Halaber, Etxerateko kideek salatu zuten Hodei Ijurko preso politikoa etzi epaitua izango dela, Soto del Real espetxean 2008an funtzionarioek egin zioten eraso bategatik. «Ijurkok salaketa jarri zuen, eta funtzionarioek ere bai; azken hauena aurrera joan da eta bi urteko zigorra ezarri nahi diote Ijurkori».