Ehunka ikasle Baionako karriketan CPEren aurka
·De Villepinek bilera egingo du gaur sindikatu nagusiekin eta datorren astean ikasle-erakundeekin.
BAIONA
Seiehun ikasle inguru kaleratu ziren atzo Baionan Lehen Lanaldiko Kontratua (LLK-CPE) erretira dezatela exijitzeko. Azken hiru asteotan ikasleak etengabe ari dira mobilizatzen Dominique de Villepinek abian jarri nahi duen kontratu mota horren kontra. Atzokoan Saint André plazan bildu ziren, IUT Teknologietako unibertsitate Institutuaren magalean eta Paul Bert lizeoaren aurrean, hain zuzen ere. Beste campusetako eta lizeoetako ikasle batzuk ere bertaratu ziren, eta, asteartean egin bezala, Saint Leoneko bihurgunera jo zuten eguerdi aldera errepidea blokeatzera. Estatu osoan LLKren kontra sortutako mobilizazio uholde-ak krisialdia sortu du Gobernuan bertan. Hain zuzen ere, de Villepinek bilera izango du gaur bertan sindikatuekin eta datorren astean ikasle-erakundeekin batzartuko da. Astearterako deitutako lan uzteak eta mobilizazioak ekiditea izan liteke helburua, baina sindikatuek diote edozein negoziazio hasi baino lehen, CPE erretiratu egin behar dela.
|
