BILBO

Martxak apirilaren 1etik 2ra iraungo du, eta «Gelditu eta pentsatu! AHTrik ez!!» lelopean, Lakuntza, Ataun, Zaldibia eta Ordizia herriak elkartuko ditu. Asanbladako kideek ibilaldian parte hartzeko deia egin zuten, batetik, ingurumenari nahiz gizarte osoari hainbeste kalte ekarriko liekeen AHT egitasmoaren kontra daudela adierazteko; eta, bestetik, Nafarroako korridorea «euskal Y»arekin lotzearen ondorioz, Nafarroan eta Gipuzkoan kaltetuko diren herrietan informazio borroka bultzatzeko.

Ibilaldia apirilaren 1ean (larunbata) 10.30ean Lakuntzatik abiatuko da, eta bi etapa egin ondoren, igandean 19.00etan Ordiziako plazan amaituko da. Eguneko sei ordu eta erdi inguru egingo dira oinez, baina bidearen zati bat egiteko aukera dagoela azaldu du Asanbladak.

Bestalde, AHTren aurkako elkarretaratzeak izango dira, larunbatean 15.00 Lizarrustin, igandean 17.00etan Zaldibian eta 19.00etan Ordiziako plazan.

Estatu espainoleko Sustapen Ministerioaren planen arabera, Arakil bailararen eta Oria haranaren artean egongo da bi sareen arteko lotura. Izan ere, Asanbladak joan den urtarrilean argitaratu zuen Abiadura Handiko Trenak Aralar mendian eragingo lituzkeen eraginei buruzko txostena, egitasmoa bertan behera utz zezatela eskatzeko.

Asanbladak esan zuen: «Nafarroako Korridorearen aferari begira ere jarri beharko dugu». Izan ere, hark azaldu zuenez, bertako Gobernuak hasi duen AHTren aldeko kanpaina zitalaren aurka lana antolatzeko eta proiektu horrek Aralarren eragingo lituzkeen inpaktu latzak direla-eta, Lakuako Gobernua «euskal Y»aren eta Nafarroako korridorearen arteko lotuneari buruz bultzatzen ari den erabateko desinformazioari aurre egitea dute helburu.

Horrenbestez, Asanbladak jakinarazi zuen jende guztia ibilaldian parte hartzera animatu nahi duela. Horiek hala, hark esan zuen aberastasun natural handiko eremuak eta kultur ondare garrantzitsuak dituen ingurunean, inposatzearen eta bertako balio natural eta kulturalei etekin ekonomikoa ateratzearen aurkako erantzun bat emango dela.