DEBA. ­ Aurreko ostiralean, Ertzaintzak Debako diskoteka batean droga banatzen zuen trafikarien sare bat desegin zuen. Guztira, lau pertsona atxilotu zituen, eta hurrengo egunean, ustezko trafikarien etxeak arakatu zituenean, 11 kilo haxix eta 5 kilo speed aurkitu zituen. Horrez gain, akusatuetariko baten etxean billete faltsuak topatu zituen. Kasua aurreko urtearen amaieratik ikertzen ari zen, diskotekan substantzia estupefazienteak banatzen ari zirela susmatzen zuelako.

BILBO. ­ Hurrengo larunbatean, Bizkaiko Batzar Nagusiek Deiadar Mendien eguna egingo dute Kolitza mendian. Orain dela bi urte, Batzar Nagusiak berrezarri zirela 25. urte betetzen zirela-eta, mendira igotzeko ohitura berreskuratu zuten; izan ere, tontor horretan, Oizen, Gorbeian, Solluben eta Ganekogortan batzen baitziren antzinako batzarrak. Martxa 9.00etan aterako da Balmasedako San Severino plazatik. Eguerdian, batzarrera deituko dute ohiko adarraren soinuaren bidez. Balmasedako mendi taldea, Gailurra, Ganzabal, Sollube 707 eta Alpino Tabira taldeak Bizkaiko Batzar Nagusiekin elkarlanean aritu dira eguna prestatzen.

BILBO. ­ Martxoaren 20tik apirilaren bukaera arte, Kone mantentze enpresak zazpi aldiz atera behar izan ditu Arangoitiko igogailuaren barruan gelditu diren zenbait erabiltzaile. Horrez gain, birritan huts egin du igogailua matxuratzen denean, kabina barruko airea berritzen laguntzeko, ateak automatikoki zabaltzen dituen segurtasun gailuak. Horregatik, auzokide elkarteak egoera behin eta berriro salatu du, eta Bilboko Udalari neurriak har ditzala eskatu dio.

BASAURI. ­ Basauriko alkateak, Rafael Ibarguenek, “Metroa orain Basaurin” plataformak ostegunerako deitu duen manifestazioaren alde egin du. Hurrengo hilabeteetan Sarratun irekiko dituzten garajeetan metro geraleku bat jartzeko eskatu nahi dute martxaren bidez. Eskaera kontuan hartzen ez badute, Basauriko biztanleek 2011. urtea heldu arte itxaron behar izango dute metroa herrian hartu ahal izateko. PSE-EE, PP, EA, EB eta EAJ alderdiek deialdiaren alde egin dute.