Urdiñarbeko Maskarada gaur izanen da Parisen
BAIONA
Apirilaren bukaera arte Zuberoa zeharkatu duen Urdiñarbeko gazteen Maskaradaren emanaldia izanen da gaur Parisko EuskalEtxean. Estatu frantseseko hiriburua izango da usaian soilik Zuberoan aurkezten den ikusgarria hartuko duena. Euskal Kultur Erakundearen eta Euskal Pilotako Ile de France eskualdeko Ligaren artean antolatua, ikusgarria pilota partida batekin batera emanen dute.
Antolatzaileek ekitaldia goraipatu dute gutxitan ikus baitaiteke Zuberoatik kanpo. «Euskal Etxeko kideek eskualde horretan dituzten familia-loturei esker lortu dugu Urdiñarbeko gazteak konbentzitzea, eta beren egutegian azken egun bat finkatzea», esan zuten.
Maskaradaren dantza, kantu eta inauterien erritu berezi horiek Parisen entzunen dira, beraz, bertako “Chiquito de Cambo” frontoian izanen den agerraldian. «Ikusgarria egiteko frontoia aukeratuz, gure helburua Maskarada bere usaiako ingurumen batean kokatzea izan da, hots, herriko plazaren antza duen leku batean. Gainera, bertan eginez, ikusle gehiago jasotzeko aukera izango dugu», argitu dute.
|
