DONOSTIA
Biolin bakarra izatearekin nahikoa duela adierazi du Izaskun Etxebeste Nicanor Zabaleta bekaren irabazleak. 22 urteko gazte irundarra izan da Nicanor Zabaleta harpa jotzaile donostiarraren omenez sortutako bekaren 14. irabazlea.
12.000 euroko laguntza jasoko du, eta Amsterdamera joango da biolin ikasketetako bigarren zikloa egitera. Orain arte bezala, Keiko Wataya izango du irakasle. Wataya Bilbon izan da egun hauetan EHUk antolatutako Kultura eta Arte Topaketetan parte hartzeko.
Irabazleak oso begi onez ikusten du Keiko Wataya: «Azken hiru urteetan berekin egon naiz Utrecht-en. Izugarri ikasi dut, eta nire helburua bigarren zikloko ikasketetan ere harekin egotea da. Oso eskola oneko irakaslea da, eta asko daukat oraindik ikasteko».
Alberto Martinez Aramberri Kutxako Kultura eta
Berrikuntza buruaren arabera, zortzi musikari izan dira beka lortzeko
hautagaiak; bost emakume eta hiru gizonezko. Biolontxelo eta biolin jotzaileak
zirela esan du, eta biola eta harpa jotzaile gutxi aurkezten direla nabarmendu
du. Hautagaietatik lauk soilik izan zuten beren jakinduria epaimahaiaren aurrean
erakusteko aukera. Lau horien artetik izan da aukeratua irabazlea.
Ate berriak zabaltzen
Gipuzkoako Foru Aldundiak eta Kutxak emandako beka eskuratzeko ezinbestekoa da Euskal Autonomi Erkidegoan edo Nafarroan bizitzea. Horrez gain, 26 urte baino gutxiagoko gazteei zuzendutako egitasmoa da. Hautagai izateko ezinbestekotzat jotzen da goi mailako musika ikasketetako tituluduna izatea eta ikasketa proiektu espezializatu bat aurkeztea. Izaskun Etxebeste lau urterekin hasi zen biolineko sokak astintzen. Donostiako kontserbatorioan hasi zituen lehen zikloko ikasketak. 2002. urtera arte han egon zen, eta hurrengo urtean Utrecht-era joan zen lehenengo zikloa amaitzera. Orain Amsterdamera joango da biolineko goi mailako ikasketetako bigarren zikloa egitera.
Irundarrak adierazi duenez, tesi bat egin beharko du bi ikasturteak amaitzen dituenean, eta dagoeneko hasi da lanak aurreratzen: «Bigarren fasea bi ikasturtetan egiten da. Master baten antzekoa dela esan daiteke. Bi urte horien amaieran tesi bat aurkeztu behar dut, eta lanean hasia naiz dagoeneko. Bi urte oso azkar pasatzen dira. Tesia elementu posturalei buruzkoa izango da».
Izaskunek nabarmendu duenez, biolin jotzaileek arazo fisiko ugari izaten dituzte. Mugimendu berbera mila aldiz errepikatzen dute instrumentua jotzen ari direnean. Oinazeak besoetan eta lepoan handiak izaten direla nabarmendu du. Ikasketak amaitutakoan ez daki zer egingo duen: «Oraingoz ikasketak amaitzea da nire helburua. Gero gerokoak».
Kanpoan ikasteagatik hemen ezer galdu ez duela esanez erantzun die kazetarien galderei. Amsterdam ez du urruneko herrialde bezala ikusten, eta bere maila gorenari eutsi nahian ekingo dio ikasturteari uda igaro ostean. Musikari sena indartzera joango da. Etxean duen XIX. mendeko biolina notarik gabe utzi beharko du musikari irundarrak, gaur lortutako bekari zukua ateratzeko.
