DONOSTIA

Etxarriko aizkolariak bi proba izan ezik, gainerako guztiak bereganatu zituen. Berak irabazi ez zituen bi saioak, berriz, Anjel Arrospidek irabazi zituen.

Kana-erdikoa zutik moztuz ekin zioten lanari, eta hor Arrospidek alde nabarmena kendu zien gainerako guztiei. Leaburuko aizkolariak bi minutu eta 13 segundotan bota zuen enborra, eta Nazabalek 2.43n. Mindegia izan zen azkena 2.51 eginda.

Bigarren proban 45 ontzakoa zeinek kolpe gutxiagotan botatzea zen helburua. Hor Nazabalek bereganatu zuen proba, 47 kolpetan erdibitu baitzuen enborra. Arrospidek kolpe bat gehiago behar izan zuen, eta Mindegiak, berriz, hiru.

Ondoren, zutik 45 ontzakoa eta tamaina bereko beste enbor bat etzanda moztu behar izan zituzten aizkolariek. Proba hori Anjel Arrospidek bereganatu zuen. Gipuzkoarra oso ongi moldatzen da zutik, eta garbi erakutsi zuen herenegun, horrela enborrak jarrita ziren bi probetan garaile atera baitzen. 2.30 izan zen bere denbora. 2.45 eta 2.56 izan ziren Nazabalen eta Mindegiaren denborak.

Azken-aurreko saioan 60 ontzakoa zeinek azkarrago moztu neurtu ziren, eta Nazabalek ez zuen hutsik egin. Etxarrikoak bi minutu eta 13 segundotan erdibitu zuen enborra, eta Arrospidek 2 minutu eta 26 segundotan. 3.05 izan zen Mindegiaren denbora.

Azkeneko lanean, aizkolari bakoitzak bi kana-erdiko eta bi 60 ontzako moztu behar izan zituen. Hor ere Nazabal izan zen garaile. 10.05 izan zen bere denbora. Atzetik Mindegia eta Arrospide sailkatu ziren, 10.48 eta 11.29ko denborak eginda.

Hala ere, lehiaketa honetan puntuak banatzen dira, eta amaieran horiek dira kontuan hartzen direnak. Nazabalek guztira 13 puntu batu zituen, Arrospidek 8 eta Mindegiak, berriz, 3.

Nafarroako Txapelketa