Oihana Bartra nagusitu zen atzo Arrigorriagan
ARRIGORRIAGA
Oihana Bartra izan zen atzo irabazle Arrigorriagan, Bizkaiko Bertsolari Txapelketaren hirugarren kanporaketan. Bartrak 396,5 puntu lortu zituen; Jabier Olibares bigarren geratu zen (368 puntu), hirugarren Urtzi Urrutikoetxea (362,5), laugarren Ion Barrocal (348,5), bosgarren Jon Unanue (347,5) eta seigarren Olatz Ibarluzea (307) sailkatu zen.
Lonbo aretora 300 bat lagun bertaratu ziren atzo arratsaldean. Maite Berriozabalek egin zituen aurkezle lanak eta epaimahaian jesarri ziren Josu Arroy, Abel Muniategi, Josu Telleria, Ainhoa Munitxa, Mirari Azula eta Iñaki Aurrekoetxea.
Oihana Bartrak, beraz, ziurtatuta dauka finalaurrekoetarako txartela. Gainerakoek, berriz, puntuazioaren arabera izango dute finalaurrekoetara pasatzeko aukera.
Hurrengo saioa datorren domekan izango da, Igorren. Hango kultur etxean, 15.30etik aurrera, Onintza Enbeita, Eñaut Intxaurraga, Iker Belaustegi, Ekaitz Larrazabal Katxo, Joseba Goienola eta Gorka Lazkano lehiatuko dira.
|
