Mahai-inguru batek itxiko ditu Iruñeko folklore jardunaldiak
IRUÑEA
Ortzadar euskal folklore taldeak antolatutako 22. Folklore Jardunaldien barruan, Iruñeko Descalzos 72 aretoak mahai-inguru bat hartuko du gaur arratsean.
“Kantua: tradizioa eta herri-adierazpena” izenburuaren inguruan antolatu dituzte topaketa hauek, eta asteazkenean eman zieten hasiera. Bi egunotan, hainbat hitzaldi egin dituzte.
Jardunaldiek daramaten lelo berarekin egingo dute bada gaurko hitzordua ere, 19.30ean, eta horretarako aski ezagunak diren Xabier Amuriza, Bixente Martinez, Natxo de Felipe, Niko Etxart eta Jean Michel Bedaxagar izango dituzte gonbidatu. Moderatzaile lanetan, aldiz, Mikel Bujanda arituko da.
Gaurko mahai-inguruaren ostean, 22.00ak aldean, kantu afaria ere egingo dute. Hori baliatuko du Ortzadar taldeak aurtengo hitzorduei amaiera emateko.
|
