Hendaiako eriondo-etxe bateko 18 langile, kalera
·«Les Flots» urte bukaeran itxi eta bertako oheak Bordele ingurura lekualdatuko dituzte.
HENDAIA
Hondartza pare-parean dagoen eriondo-etxea itxi eta bertan ari diren hemezortzi langileak lanik gabe geratuko dira urte bukaera aldera, CFDT sindikatuak atzo jakinarazi zuenez.
Atseden-etxeko hiru eraikinak moja domingotarrenak dira, baina Pierre Reveillas enpresariari alokatu zioten merkataritzako funtsa 2002an. Geroztik, ordea, Reveillasek ez du inolako inbertsiorik egin, segurtasunak behartutako bakan batzuk salbu eta orain, Ospitalizazio Eskualdeko Agentziak (ARH) bere oniritzia eman ostean, Talencera eramango ditu 32 oheak.
Langileek duela gutxi izan dute horren berri eta ugazabak eriondo-etxe berrirako lanpostuak eskaini dizkie. Inork lekualdatzea onartu ez duenez, kaleratze prozedura abiatuko du. CFDTk dio Reveillasek hasieratik izan duela asmo hori eta operazioa «ezkutuan, langileei ezer esan gabe» egin izana salatu du. Prestakuntzarako eta lan berria bilatzeko laguntzak erdiesteko kaleratze-plana negoziatu nahi dute langileek. Bestalde, Hendaiako auzapezarekin hitzordua lortu dute eta beren eskaerak babesteko eskatuko diote. Atzo, elkartasuna adierazi zieten langile ohiek, erabiltzaileek eta bi udal-ordezkarik.
|
