- Berezkoak
Loquillo lehen kanporaketan kaleratu dute
·Kurutxarirekin batera Larretxeak ere aurrera egin du Idiart menderatuta
LOQUILLO 34
KURUTXARI 40
LARRETXEA 40
IDIART 39
DONIBANE GARAZI
Andde Kurutxari eta Olivier Larretxea izango dira Superprestigioko lehen faseko bigarren kanporaketan, atzo lortu baitzuten horretarako txartela. Azken batean, iragarpenak bete egin ziren.Jendeak bazuen Loquillo mexikarra ikusteko gogoa. Jokatzeko era berezia dauka, eta jendea gustura egon zen bera ikusten, baina garbi dago amateurretatik profesionaletara salto dezentea dagoela. Bera da amateurren Munduko txapelduna, baina atzo ikusi zuen onenekin jokatu ahal izateko asko hobeto beharra daukala. Kintzeak finitzeko erraztasun handia erakutsi zuen, baina botearekin min handia egin zion Kurutxarik. Gainera, hura ez da sakatzaile horietakoa, eta hala ere hamabost sartu zizkion. Hor zulo handia dauka, eta hortik eraman zuen partida Kurutxarik. Bigarren partida bikaina izan zen, eta azkenean Larretxeak eraman zuen garaipena, baina Idiartek ere berdin-berdin irabaz zezakeen. Kanporaketa oso orekatua izan zen, berdinketa askorekin, eta 39 eta 39 ere egon ziren. Kintze hori oso luzea eta borrokatua izan zen, baina Larretxeak pilota atzean sartu zion azkenean, eta Idiartek ezin izan zuen hori itzuli. Hortxe amaitu zen neurketa. Lehen faseko azkeneko bi kanporaketak datorren astelehenean jokatuko dituzte. Kurutxari eta Ozafrain neurtuko dira, baita Larretxea eta Sorhuet ere.
|
