BIARRITZ 27
BORDER REIVERS 17

BIARRITZ

Zuri-gorriek ia eskuetan dute final-laurdenetarako txartela, baina horretaz gain, hurrengo fasera sailkatzen diren zortzi taldeen artean, lehenengo lauretan geratu nahi du, horrek final-laurdenak etxean jokatzeko parada emango bailieke, eta horretarako ahalik eta punturik gehien batzea ezinbestekoa da lapurtarrentzat.

Atzo ere garbi zuten, irabazteaz gain, puntu gehigarria ere behar zutela eta horretara zelairatu ziren.Lehen zatian eskoziarrak baino hobeak izan ziren. Euskaldunek talde handia dute, eta hori ere argi eta garbi geratu zen lehen ordu erdian. Zuri-gorriek hiru entsegu eta transformazio bat eginak zituzten 35. minuturako, eta 17-0 aitzinetik ziren.

Puntu gehigarria lortzeko gutxienez lau entsegu behar dira, eta partida ere nahikoa bideratuta zutenez gero, erritmoa apur bat jaitsi zuten. Hala ere, eskoziarrek lehen zatiko azkeneko jokaldira bitarte ez zuten puntu bat bera ere lortu.

Bigarren zatian, ordea, lo zelairatu zirela zirudien, eta kanpotarrak horretaz ohartu egin ziren, eta aurrea hartu zieten. Transformatutako bi entsegu ere egin zituzten, eta hiru puntura jarri ziren kanpotarrak (17-14). Minutuak aurrera zihoazen, eta laugarren entsegua ez zen etortzen, eta garaipenak berak ere bazuen arriskurik. Hala ere, partida amaitzeko minutu bat besterik geratzen ez zenean, Bobok egin zuen euskaldunen laugarren entsegua, nahiz eta transformazioarekin huts egin zuten. Arauzko denbora igaro eta hiru minutura bosgarren entsegua ere egin zuten zuri-gorriek, ordurako eskoziarrek partida galdutzat emana bazuten ere. Amaieran garaipena eta puntu gehigarria izan ziren Olympiquekoentzat, baina kostata. Dena erraz izatetik ia garaipenak ihes egitera pasatu ziren, baina azkenean dena ongi atera zen lapurtarrentzat.