Berriro ere, Osasunak europako ametsa ahaztu behar du, Ligako amesgaiztoari amaiera ematen saiatzeko. UEFAn goruntz joan ahala, gorritxoak maldan behera dabiltzate etxean azken bolada honetan eta horrela jarraituz gero, arazoak izan ditzakete denboraldi amaiera honetan.

Ez litzateke gauza txarra izango talde nafarrak Europan daraman ibilbidea ispilutzat hartuzea Ligari begira. Ostegunean Glasgowen jokatutako partida, izan ere, abiapuntu egokia izan daiteke; betiere, Osasunak bolada txarraren etenalditxo bat bezala hartu ordez, bolada on baten hasieran bihurtzen badu.

Emaitzari dagokionez, eta, batez ere, jokoari dagokionez. Izan ere, sailkapenean gertatzen ari diren jauziak balaztatzeko, gorritxoek hobe lukete garaipena eskuratzea, baina argi dago hori lortzeko biderik onena ondo jokatzea dela.

Ibrox Park-en eskainitako irudia errepikatzen saiatuko dira, beraz, Jose Angel Zigandaren gizonak, txapelketa aldatu arren. Baita taldeaz ere, entrenatzaile nafarrak -atzo ezer ez aurreratu arren- goitik behera aldatuko duela baitirudi. Glasgowen jokatu ez zuten -edo jokatu ezin izan zuten- jokalari fresko eta titularrekin beteko du Zigandak gaurko hamaikakoa. Krutxaga, Javier Flaño, Puñal edota Soldado hasieratik egongo dira, beraz, zelaian.

Zenbait arazorekin helduko da Valentzia Sadarrera. Hauek ez dute behar txapelketa baten duten ibilbidea eredutzat hartu, denetan ari baitira ondo. Alde batetik, Champions League-n jarraitzen duen Ligako ordezkari bakarra dugu; bestetik, Ligan bertan, txapela eskuratzeko faboritoen artean jarraitzen du, batez ere, azken aldi honetan izan duen boladari esker. Izan ere, Quique Sanchez Floresen taldeak -nahiz eta bluff-en bat eskaini duen, adibidez Nasticen aurka- bederatzi garaipen lortu izan ditu azken hamabi jaurdunaldietan, hauen artean, Zaragoza, Atletico edota Bartzelonaren aurka eskuratutakoak.

Arazoren bat, hala ere, badauka Valentzia taldeak, batez ere denboraldi luze eta gogorrak eragindakoak. Hain zuzen ere, lesioak eta zigorrak. Kasu honetan Silva eta Vicente etxean utzi dituztenak, Sanchez Floresi ezker hegala osatzeko arazoak sortuko dizkio. Angulo eta Angel Vianaren artean aukeratu beharko du, pibote bikoitzan Marchenak Baraja ordezkatzen duen bitartean.