Normalean, kostata lortzen diren gauzak gusturago dastatzen dira. Horregatik, asebeteta amaituko du Jose Angel Zigandak azken hilabeteotako denboraldi «izugarria».

Entrenatzaile nafarrak, behintzat, lasai ekingo die azken bi partidei, igandean mailan mantentzeko helburua eskuratu baitzuten. Azken garaipen horren ondorioz, eta taldearen portaera askok luparekin begiratuko dutela jakin arren -beherapena eta Europa dute jokoan hurrengo aurkariek-, badirudi betebeharren atala itxi eta azterketena zabaldu dela. Eta argi utzi zuen Zigandak berena zein den. Denboraldia oso gogorra izan da; oso memento zailak izan ditu Osasunak, baina Ligan helburua lortu eta Europan ibilbide ikusgarria izan ondoren, sentipena gogobetetasuna izan behar da nahitaez.

«Esprint baten erritmoan egindako maratoia izan da; izugarria izan da dena -aitortu zuen gorritxoen entrenatzaileak-, baina kirol helburuei dagokienez, denboraldia bukatuta dago. Urtea oso luzea egin zaigu eta orain harro sentitu behar dugu agonia gabeko bi partida polit jokatzeko aukera edukitzeagatik».

Denboraldia denentzat izan da gogorra, are gehiago entrenatzailearentzat; batez ere, hasieran izandako arazoengatik. «Pertsonalki, urtea ikaragarria izan da. Oso memento gogorrak izan ditugu, eta hasiera sinestezina izan zen -onartu zuen Zigandak-. Inguruan komentatzen dena heltzen zaigu, eta oso gorra izaten da, baina gugatik, baita inguruko jendearengatik ere». Baina argi dauka Cucok «nola edo hala» eutsi behar dela, Osasunaren entrenatzailea izatea «oso gauza handia» delako. «Izugarri sufri daiteke, baina merezi du; batez ere, helburua eskuratzen bada», esan zuen.

Bere buruari buruz baino, nahiago du Zigandak, hala ere, taldeari buruz hitz egin. Harrotasuna sortu behar duen taldeaz, hain zuzen ere. «Jendea taldearekin pozik egotea nahi dut, nirekin baino gehiago. Eta jendea pozik baldin badago, ni `super pozik' nago. Oso harro egon behar dugu Osasunak egin duen denboraldiarekin, taldeak bere kasta atera duelako eta denek beren harri-koskorra ekarri dutelako. Hori da aurrera egiteko modu bakarra», adierazi zuen.

Honakoa adierazi zuen entrenatzaileak: «Hainbat talde daude guk baino aurrekontu askoz handiagoak dituztenak, baita, teorian, talde hobeak dituztenak, eta, hala ere, asko sufritzen dutenak. Gauzak lortzeak asko kostatzen du eta lortu dugunarekin disfrutatu behar dugu».

Woody Allenen filma

Denboraldi gogor honi ginga ipintzeko, Osasuna asteko polemikaren erdi-erdian egon zen azken jaurdunaldian, Realaren kontrako derbia zela-eta. Esperientzia sinestezina Zigandarentzat. «Igandean galduz gero, Donostikoak oso pozik egongo lirateke, baina gainerako leku guztietan zer-nolakoak entzun beharko genituzke. Oso surrealista izan da; Woody Allen etor daiteke film bat egitera».

Argi zeukan entrenatzaileak, hala ere, partida hasi aurretik, baita amaitu ondoren ere. «Irabazi, berdindu edo galduz gero, polemika egongo litzateke, baina nahiago dut gaizki geratzea horrela, konzientzia lasai edukita. Mantentzearen helburua lortzeke geneukan eta ezin genuen horrekin espekulatu».