Joan den igandean amaitu zen Emakumeen Italiako Giroa eta parte hartu duten zazpi euskaldunetan onena izan da Maria Gallastegi txirrindulari gipuzkoarra. 37. amaitu du sailkapen nagusian, Edita Puncinskaite irabazlearengandik 15 minutura.

Maria «ahalik eta gehien disfrutatzera eta gauzak ahalik eta ondoen egitera» joan zen Italiara. Hala ere, Giroan lortu dituen emaitza zoragarriak ez zituen espero eibartarrak. «Hasieran beldurrarekin joan nintzen bertara, egun asko bata bestearen atzetik bizikletan egin behar genituen-eta; azkenean, bederatzi etapa izan dira eta niretzat horrenbeste egun jarraian egitea esperientzia berria izan da». Helburuak hain erraz bete dituela-eta, oso pozik ageri da Italiatik bueltan. «Bukatze hutsarekin pozik egongo nintzateke; beraz, euskaldun onena izatearekin, oso pozik nagoela uste dut».

Italiako Giroa emakumeen txirrindularitzan dagoen probarik garrantzitsuena izateaz gain, gogorrena ere bada. Hori dela-eta, «esperientzia polita izan den arren, oso gogorra» izan dela onartzen du Gallastegik. Munduko txirrindulari onenek parte hartzen dute bertan eta hori lasterketak zeukan maila altuan islatzen dela uste du Bizkaia-Panda taldeko txirrindulariak. «Bertan argi ikus daiteke hau dela nesken egutegi barruan dagoen lasterketarik garrantzitsuena, jendea topera heltzen da eta bertan munduko eta herrialde desberdinetako txapeldun asko ikusten dira».

Bederatzi eguneko proba batek ekartzen dituen gorabeherek ere eragina izan dute txirrindulari euskaldunarengan. «Han, egia esan, ez daukazu denbora asko lasterketaz disfrutatzeko, egunak lekualdatze artean joaten zaizkizu, lasterketa bukatu, hotelera joan, masajea hartu, afaldu eta ohera».

Debabarrenatik Bizkaiara

Italiako Giroan egoteko taldez aldatu behar izan du Maria Gallastegik. Euskal Herriko denboraldia Debabarrena taldean bete du Bizkaiko Bira arte, eta handik aurrera Bizkaia-Panda-Durango taldean ibili da. Talde aldaketa horren arrazoiak berak azaldu dizkigu: «Giroa lasterketa profesionala da eta horregatik UCI lizentzia daukan talde batekin bakarrik joan nintekeen hara, beraz, Bizkaia taldearekin Girora joateko hitzarmena sinatu genuen». Hemendik eta denboraldi amaiera arte Bizkaia taldean ibiliko da gipuzkoarra, nahiz eta datorren hilabeteetan egingo duen egutegia oraindik erabaki ez duen arren.