Iaz Zornotzan abiatutako festibala dugu Belarreggae, izenak berak agerian uzten duen moduan, doinu jamaikar beroz blai datorrena. Radiationek antolatua, indartsu jaio zen jaildia Luciano izarraren parte hartzearekin eta indartsu dator oraingoan ere, Sizzla Kalonjik gurean egingo duen lehenengo agerraldiarekin. Miguel Orlando Collins 1977an jaio zen Saint Maryn, eta reggae musikako izar handia dugu egun. Jamaikako gazteriaren pobrezia, itxaropenik eza eta zapalkuntza ditu gai hitzetan Bobo Ashanti rastafari sinesmeneko artistak eta dagoeneko hogeita hamar lanetik gora ekoitzi ditu, 1995ean Zagalou disko etxean «Burning Up» debuta egin zuenetik. Azkena, hamabost kantez osatutako «I-Space», Greenseleeves disko etxean plazaratu duen hamargarrena. Ekoizle lanak Byron (In The Streetz) Murrayk egin ditu Big Yard estudioetan.

Azkenaldian kalapita ugari sortu da artista jamaikarraren hitzekin eta homofoboa izatea leporatu izan diote izarrari. Zornotzan The Firehouse Crew bandarekin arituko da.

Junior Kelly ere jamaikarra eta rastafaria dugu. 1969an jaioa, Spanish Townen hezitakoa dugu eta debuta egin eta hamar urte geroagoko «If Love So Nice» (1995) singleak eman zion ospea. 2005eko «Tough Life» du azken lana (VP Records). Chulito Camacho madrildarra dugu. «18 Quilates» izeneko hip hop lanarekin debutatu ostean, «Las Heridas del Corazón» (Boa, 2003) dancehall diskoa ekoitzi zuen eta orain «Kinky Music» aurkeztuko digu, iaz izen bereko disko etxean irarria. Biharkoan The Ranking Soldiersek lagunduko du.

Utan Bassum abeslari madrildarrak «Utan Bassum Inna Chalice Connection» debuta aurkeztuko du Mad Sensi Bandekin batera eta Jahsta Reggae Band hamarkote zaragozarrak «Legado», oraindik argitaratzeke dutena. Reggae Contesteko irabazle Franciska italiarrek irekiko dute jaialdia.

Festak jarrai dezan, txosnetan Luv Messenger Sound bartzelonarrek joko dute goizaldean.

Garraiobidea

Reggae Contesteko partaide ere bada Belarreggae. Txapelketa horretako irabazleek bederatzi jaialditan jotzeko saria eskuratzen dute, tartean Europako reggae jaialdi handiena den Italiako Rototom Sunsplash festibalean.

Garraioa errazte aldera eta Zornotzako jaiak direla kontuan hartuz, Euskotrenek ohiko zerbitzuaz gainera trenak jarri ditu gauean orduro Zornotzatik Bilbora itzultzeko.

BUM (Bilbao Urban Musikaldia) jaialdia ere antolatu du Radiationek, udazkenean Bilboko zezen plazara Morodo, 7 Notas 7 Colores, La Mala Rodriguez edo Mos Def hip hop izarrak hurbilduko dituena.