Fedea mendiak mugitzeko gai dela esan ohi dute. Athleticzaleek beste edozer ez, baina euren taldean fede itzela daukate. Bestela nola azaldu, atzo, aurkezpen ekitaldia hasi baino ordubete lehenago San Mames inguruak jendez lepo egotea. Ateak zabaldu aurretik, ilarak nabarmenak ziren. Hori, bigarren mailara jaistekotan egon den talde bat izanik, baina Athletic klub berezia da. Bere filosofia berezi eta zirraragarriak, zein bere zaleek desberdin egiten duten talde bat da Athletic.

Ilusioa nabari zen zaleen artean, aro berri bati ekin baitiote bilbotarrek uda honetan. Presidentea, talde zuzendaritza, entrenatzailea, lau jokalari eta elastiko berriak estreinatuko dituzte zuri-gorriek hastear dagoen denboraldian. Dena den, jendeak ez du hain erraz ahazten, eta `berriei' gauzak bere lekuan ipini zizkieten. Talde zuzendaritza berriko kideek palkoan euren lekua hartzen zuten bitartean, txistu andana entzun behar izan baitzuten.

Zaletu guztien nahia, azken bi urteetan pairatutako sufrikarioa atzean uztea da. Izan ere, aurrekoen tankerako beste denboraldi bat jasangaitza litzateke Athleticen inguruarentzat. Hortaz, liga txapelketa inolako agobiorik ez pasatzea eta Kopan ahalik eta maila onena ematea lirateke Athleticen helburuak. Hortik gorakoak, pozez zoratzen hartuko lituzkete bai jokalariek, baita zaleek ere.

Aurkezpena ere desberdina izan zen. Apurka-apurka Athleticeko harrobiko talde guztiak San Mamesera irtetzen joan baitziren. Txikienek gozatu ederra hartu zuten, horrelako txalo zaparradak entzutean. Baita nesken bigarren taldekoek ere.

Horiek hala, lehen taldeko jokalariak plazaratu ziren. Banan-banan zelairatu ziren, euskaraz eginiko aurkezpen pertsonalizatu baten erdian, eta zalantza izpirik gabe txalo gehien entzun zituen jokalaria Carlos Gurpegi izan zen. Aldiz, Aranzubiak, «pesetero» zioen pankarta bat ikusi behar izan zuen.

Guztira, talde zuri-gorriko 29 jokalari irten ziren zelaira. Horien artean, berrikuntza nabarmenenak, Aitor Ocio, Iñaki Muñoz, David Lopez eta David Cuellar fitxaketez gain, Raul Fernandez, Jon Velez eta Markel Susaeta gazteak izan ziren.

Hala ere, oraindik taldea ez dago itxita. Hala, Caparrosek atezain bat -zurrumurruen arabera, Gorka Iraizoz izan daiteke-, ezker hegaleko bat eta aurrean jokatzeko jokalari bat eskatu baititu.

Izan zirelako gara...

Bai, hainbatetan ezker abertzaleak gudari eta borrokalariei ohore egiteko aipatutako «izan zirelako gara, garelako izango dira» esaldia, San Mamesen entzuteko aukera izan zen atzo. Izan ere, egungo lehen taldeko kideekin batera, garai ezberdinetako ia 30 jokalari ohi zelaraitu baitziren. Euren artean, Joxe Anjel Iribar, Rafa Iriondo, Fidel Uriarte eta Manolo Sarabia mitikoak zeuden. Guztiek txalaparta doinuak lagun izan zituzten.

Behin jokalari ohiak zelaraituta, klubeko partaide diren jokalari guztiek eta beteranoek familia argazkia atera zuten. Euren bizkarrean pankarta erraldoi bat. Horren leloa ere, aski ezaguna Euskal Herrian: «Jo ta ke, irabazi arte».

Ondoren, Fernando Garcia Macua presidente berriak hartu zuen hitza. Nabarmentzekoa da hitzaldia euskaraz egin zuela, nahiz eta abokatu bilbotarrak hizkuntza hori hitz egiteko gai ez den. Berau, jokalari eta zaletuei zuzendu zitzaien. Lehenengoei «profesionaltasuna» eskatzeaz gain, «gugan, gure proiektuan sinestea eta gure filosofia tresna bezala ikustea bide bakarra dela» jakinarazi zien.

Behin Macuaren txanda amaituta, Joaquin Caparrosen momentua ailegatu zen. Utrerakoak «hainbeste sentimendu eta ospe duen talde bateko partaide izatea pribilegio bat dela» nabarmendu zuen. Horrez gain, «guztion artean familia bat izan behar dugula» adierazi zuen. Azkenik, «odol zuri-gorriak irakiten» diola azpimarratu zuen. Esaldi horrek publikoaren artean «Jokin!, Jokin!» oihuak sorrarazi zituen.

Bestalde, Joseba Etxeberria kapitainak jokalari berriei agurra egiteaz gain, joandakoei ere eskerrak eman zizkien euskaraz eta gaztelaniaz. Halaber, zaletuei azken bi denboraldietan pasatutako penak atzean laga nahi dituztela ohartarazi zien. Behin hitzaldiak amaituta, Caparrosenek entrenamendu saio arina egin zuten.

Gaur hirukoa Barakaldon

Zuri-gorriek denboraldi-aurreko lehen froga izango dute gaur Lasesarren. Bertan hiruko txapelketa bat jokatuko dute Barakaldo eta Sestao River taldeen kontra 19.45etik aurrera. Lehen partida Ezkerraldeko bi taldeen artekoa izango da. Horren ostean, Athletic Sestao Riverren aurka arituko da 45 minutuz. Ordubete beranduago, Barakaldoren kontra jokatuko dute.