Protagonista berezia izan zen atzo Lezamako instalazioetako prentsaurrekoan. Joseba Etxeberriak bere sentsazioak azaldu zituen bertan. Izan ere, jokalari gipuzkoarrak 400 partida bete ditzake asteburu honetan Zaragozaren aurka jokatuz gero.

Etxeberriak aitortu zuenez, bere ibilbidea hasi zuenean ez zuen inolaz ere pentsatu hainbeste partida jokatuko zituenik. Dena den, jokalariak nahiago du taldean eta larunbateko partidan pentsatu: «Zenbaki garrantzitsu bat da, baina buruan dudan ideia bakarra larunbatean irabaztearena da. 400. partida jokatzen badut, primeran egongo da, eta gola sartzen badut, askoz hobeto. Hala ere, 400.a egin ondoren hurrengo partidan pentsatu beharko da».

Hamabi urte joan dira Elgoibarko jokalariak debuta egin zuenetik, eta gauzak asko aldatu direla aipatu zuen: «Gauzak asko aldatu dira, baina zorionez ordutik gaur arte gauza positibo asko izan dira. Horrelako partidetan beti botatzen duzu begirada txiki bat atzerantz eta, nire ustez, gauza guztiak onak izan dira eta espero dut hemendik aurrera ere horrela izatea eta zenbaki hori handitzea». Gainera, «lesioek errespetatu naute eta entrenatzaileek nigan eduki duten konfiantza oso handia izan da», gehitu zuen.

Larunbateko aurkariaz ere aritu zen Etxeberria. Zaragoza izango dute aurkari zuri-gorriek, baina jokalariak oso talde sendoa mantentzen jarraitzen dutela uste du: «Iaz oso talde ona zuten eta aurtengo fitxatzeen ondorioz, oso talde gogorra dute. Denboraldi amaieran segur aski goiko postuetan egongo dira».

Presioa Llorenterentzat

Fernando Llorente ere aritu zen atzoko prentsaurrekoan. Ismael Urzaizek utzitako hutsuneak presioa sor diezaiokeela aitortu zuen: «Presioa izan dezaket, baina ez Ismael Urzaizengatik soilik, baita nigatik ere; gauzak ondo egin nahi ditut eta urte ona izan nahi dut».

Taldean tokia edukitzearen inguruan ere hitz egin zuen aurrelari gazteak: «Entrenatzaileak esaten didanari kasu egin behar diot. Hori egiten badut eta bere aholkuak jarraitzen baditut, ondo joango zait denboraldian», amaitu zuen Llorentek.