Betizu, Betisuis, Eme-U, Bull, ikerlaria, Mamu eta Xanuak, ETBko pertsonaia ospetsuak, bueltan dira berriz. Izan ere, gaur bertan estreinatuko dute euskaraz «Betizu eta Urrezko zintzarria» film luzea Euskal Herriko hiriburuetako zinema aretoetan. Egoitz Rodriguez Oleak zuzendu duen marrazki bizidunen lan berria da eta «Betizu eta Xangaduko Misterioa»-ren jarraipen zuzena da. Rodriguezek berak azaldu duen bezala, ««Betizu eta Xangaduko Misterioa» filman zeharka agertu ziren hainbat istorio sakondu dugu». Esate baterako, aurrekoan zientzialaria zeharka agertu zen eta oraingo honetan Mamu izeneko zientzialaria film osoan zehar azaltzen da.

Betizuen filmek antzekotasun handia badute ere, aurrekoarekin alderatuta, desberdintasun nabarmenak daude. Oraingo honetan Betizuak Urrezko Zintzarriaren misterioan murgilduko dira. Urrezko zintzarria jotzea lortzen duenak espezie osoa bere menpe izatea lortuko du. Helburua lortzeko asmoz, Betizuek pertsonaia ugarirekin topo egingo dute, hala nola, Mamu zientzialari zoroarekin. Honez gainera, pertsonaia desberdinen adiskidetasuna lortuko dute.

«Betizu eta Urrezko Zintzarria» filman, Betizuak abentura arkeologiko baten barne topatuko ditugu, leizezuloetan sartuta proba desberdinak gainditu beharko dituzte desiratutako helburua lortzeko: urrezko zintzarria, alegia.

Mezuari dagokionez, Egoitz Rodriguezen esanetan, «kasu honetan balore bakarra aukeratzea erabaki dugu, adiskidetasuna. Aurrekoan balore ezberdinak aipatu ziren. Hori dela eta, Betizuek adiskidetasunak gizartean duen garrantzia ikasiko dute. Adiskidetasunak zer suposatzen duen erakutsi nahi izan dugu. Horretarako pertsonaia gaiztoen eta zintzoen arteko bereizketa garbia egin dugu. Gaizto nagusia Mamu zientzialaria da, eta harekin borroka egin beharko dute Betizuek. Zientzialari hau beti bakarrik dago, lagunak izan beharrean menpekoak izan nahi baititu. Zintzoen artean, aldiz, pertsonaia ezberdinak daude: lan taldean aurrera egiten dutenak edota gaiztoa izan ez arren bakarrik ibiltzea nahiago dutenak. «Azkeneraino iristeko adiskidetasunak duen garrantzia azpimarratu nahi izan dugu, bizitzan gertatzen den moduan. Lagunik gabe zenbait unetan ezin baitugu aurrera egin».

Lantaldeari dagokionez, aurreko filmetan gertatu zen bezala, nahiko zabala izan da eta 30 pertsona inguruk osatu dute.

Baleuko ekoiztetxeak azken urteotan animazio alorrean hainbat film ekoitzi ditu: «Olentzero gabonetako ipuina» eta «Betizu izar artean» animazioko film luzeak 2003 urtean. Urtebete geroago, «Unibertsolariak munduaren ertzaren bila» eta «Olentzero eta subilaren lapurreta» animazioko film luzeak aurkeztu zituzten. Azkenik, iaz «Betizu eta Xangaduko misterioa» animazioko film luzea estreinatu zuten.

Gainontzeko lan taldea mantendu bada ere, film berriak hainbat berrikuntza ekarri ditu. Horietako bat kanten hitzen egilea da, izan ere, Julen Gabiriaren esku egon da eta aurrekoan, aldiz, Xabier Amuriza bertsolariak idatzi zituen. Musikari dagokionez, kanta gehienak Kukuma taldeko abeslaria den Pottoki-k kantatu ditu.

Datuei erreparatuz gero, 1.200 plano baino gehiagoz osatuta dago filma eta 65 minutuko iraupena du. Zuzendariaren hitzetan, «pelikulak oso erritmo azkarra dauka eta hori lortu ahal izateko lau edo bost lan talde sortu genituen eta ondorioz, montaia paraleloa egin genuen; horrek lan prozesua azkarragoa izatea eragin zuen».

Betizuzaleek ezagunak suertatuko zaizkien pertsonaiak topatuko dituzte. Horien artean Betizu, taldeko burua, Betisuis, suitzar jatorriko behi lodia; Marroi, euliz inguratuta bizi den behia eta ikertzailea, Marroiren lankide dena. Honez gainera, Mamu izeneko behi argal eta zaharra ere topatuko dugu, bera ere Urrezko zintzarriaren bila ibiliko baita abenturan zehar.