Ikasle Abertzaleetako emakumeen taldeak eskoletan «egunero nesken aurkako eraso sexistak salatzea eta alboratzea» nahitaezkoa dela adierazi zuen, atzo, Bilbon emandako prentsaurrekoan. «Emakumeen aurkako indarkeriaren kontrako euskal ikasleon adierazpena», adostasunean eratu zuten taldeko emakumeek iragan astean, Usurbilen, Ikasle Egunaren harira, egindako topaketan. Haren bidez, gaitzetsi egin zuten hezkuntza sistemaren eremuan jarrera sexistak gainditzeko eta aurre egiteko igarri duten borondate falta.

Ikastetxeek eta irakasleek halako egoeren aurrean duten «jarrera pasiboa» salatu zuen talde horrek. «Ikasgela barruan, egunero ematen dira emakumeen aurkako eraso fisiko zein psikikoak, baina irakasleek ez dute horien aurkako jarrera gogorrik hartzen. Normaltasun egoera transmititzen dute eta, era horretan, konplize bihurtzen dira», aipatu zuen Ikasle Abertzaleetako emakume taldeak heda- bideen aurrean.

Hala, hezkuntza sistemak arazoa bideratzeko duen eginkizunaz ohartarazi zuen. «Hezkuntza ezinbesteko zutabea da pertsonen garapenean eta jendartearen eraikuntzan, haren bitartez rolak, jokabideak eta jarrerak irakatsi eta transmititzen diren neurrian. Azken batean, hezkuntza sistemak, aurre egin beharrean, errepikatu egiten ditu jendartean ematen diren harreman eta jokabide sexistak».

Erasoei erantzuteko beharra

Egoera latz horren aurrean, taldeak «erasoei erantzuteko konpromisoa» agertu zuen, eta, une horretatik aurrera, «nolanahiko eraso sexistaren aurrean erantzun bateratua» emango duela ziurtatu zuen. Hein horretan, hezkuntza sistemak arazoa bideratzeko duen erantzukizuna nabarmendu zuen beste behin.

IAk «beste hezkuntza sistema» baten beharra nahitaezkotzat jo zuen, «balore feministetan oinarritutako eskola hezki- dea», hain zuzen. «Euskal Herriko ikasleok ez dugu harreman hierarkikoak sortzen eta ahalbidetzen dituen hezkuntza nahi; haren ordez, hezkidetzarako bidea emango digun hezkuntza sistema edukitzeko eskubidea aldarrikatu nahi dugu», esanez amaitu zuen agerraldia.