Urrezko Aizkorako lehen fasea bere amaierara heldu da, eta etzi jakingo da final laurdenetan izango den azkeneko bikoaren izena zein den. Izan ere, 12.30etik aurrera jokatuko baita Lekunberriko pilotalekuan fase horretako azken ekinaldia.

Bertan, Mindegia-Rekondo Barberena-Mugertza I.aren aurka neurtuko dira. Irabazten duenak multzoko bigarren postua lortuko du, eta horrekin batera hurrengo fasean izateko txartela ere bai. Multzo horretako beste bikoa Larretxeak eta Atutxa II.ak osatzen dute, baina horiek sailkatuta daude, bi saioak irabazi baitituzte.

Etziko neurketa horretarako, Mindegia eta Rekondo izango dira faborito. Ezkurrako aizkolari beteranoak sasoiko dagoela argi eta garbi utzi zuen pasa den igandean egin zuen marka saiakeran. Rekondo nola dagoen, berriz, ikusi egin beharko da. Orain dela hiru aste Otaegiren aurkako apustua galdu zuen arren, pentsatzekoa da, dagoeneko gaindituta izango duela.

Barberenarentzat eta Mugertzarentzat lehen saioa izango da. Estreinekoa jokatzeari uko egin behar izan zioten, mutrikuarra min hartuta zegoelako. Osatu da jadanik, eta ahaleginduko da garaipena erdiesten. Gainera, proba irabazten baldin badute, Mugertzak bere semearen aurka jokatu beharko du final laurdenetan, izan ere, garaipena lortzen duen bikoak, Nazabalen eta Mugertza II.aren aurka jokatu beharko baitu.

Etzi, Lekunberrira doan ikusleak, gainera, ez du helduen mailako saioa bakarrik izango ikusgai, egun berean, bertan izango da-eta gazteen mailako norgehiagoka ere bai. Alde batetik Larretxea lehengusuak arituko dira, eta bestetik Saralegi-Olano. Larretxeatarrak izango dira neurketa irabazteko faboritoak. Eskarmentua ere besteek baino handiagoa dute, eta adin hauetan horrek asko balio izaten du. Bi bikoentzat estreineko norgehiagoka izango da.

Desafioa

Bihar jakingo da Tolosan, Arrospidek apusturik egiten duen ala ez. Leaburukoak Gabonak baino lehen bota zuen apustua, eta berak dioenaren arabera, prest dago sei oinbikotara jokatzeko. Hori bai, hiru zutik eta hiru etzanda beharko omen luke izan. Bera, 6.000 eurotik 9.000 eurora arte dirutan jokatzeko prest legoke, eta martxo inguruan jokatuko litzateke apustua. Bihar, 19.30etik aurrera Tolosan egongo da bera, Kantabriko tabernan.

Azken egun hauetako zurrumurruen arabera, badirudi Donato Larretxea, behintzat, agertzeko prest dagoela. Gero ikusi egin beharko da apustua gauzatzen den ala ez, baina badirudi bakarren bat agertuko zaiola Anjel Arrospideri.