Martxoaren azken egunekin batera abiatu zen mendi lasterketen denboraldia. Izan ere, joan den hilaren 30ean bi hitzordu izan ziren: Adarramendiko zein Sarako lasterketak. Bi horiei beste makina bat «kide» gehituko zaizkie datozen hilabeteotan, baina Euskal Mendizale Federazioak antolatutako zirkuitu ofizialaren lehenengo agerraldia joan den igandean izan zen.

Protagonista Gasteizko lehenengo mendi maratoia izan zen. Eta, aipatu ditugun bi lehia «txiki» horiek bezala, Gasteizkoak harrera ezin hobea izan du. Euskadiko Txapelketaren aurpegiarekin aurkeztu zitzaigun eta, oro har, ia inork ez zuen huts egin hitzordura. Han ziren egungo espezialista garrantzitsuenak, eta hauek guztiek eman zuten maila bikaina baino bikainagoa izan zen. Gainera, lehenengo aldia izateko, maratoi hori erabat biribil atera zen. Eguraldiaren egoerari dagokionez, fresko. Parte hartzea ere ez zen atzean geratu, eta 162 lagunek erdietsi zuten maratoia bukatzea. Gainera, lasterketarekin batera (ibilbide bera zuen) 180 mendizalek egin zuten ibilaldia.

Batzuen arabera, mendi lasterketen denboraldi honen hasieran maratoi izaerako (42 kilometrokoa) lehia bat deitzea oso goiztiarra zen, besteak beste, korrikalariek denbora gehiago behar dutelako hain iraupen luzeko lasterketa bat ongi prestatzeko. Hala ere, igandean ikusi zen legez, lehiakide gogorrenak sasoiko iritsi ziren Euskadiko Txapelketara.

Jakin bagenekien oso ibilbide azkarra zela, baina lehenengo sailkatuek egindako markek denak harritu dituzte. Zoritxarrez, eta hau ohikoa izaten ari da, atal ezkor bat gailendu zen. Eta hori emakumezkoen parte hartze eskasa izan zen; soilik bostek korritu zuten: lauk nagusien mailan, eta besteak beteranoenean.

Haatik, aurreratu dugun bezala, Gasteizko lehenengo mendi maratoia biribil atera zen. Eta hori baieztatu dute bai lasterkariek eta baita antolatzaileek ere. Ibilbide azkarra eta 1.876 metroko desnibela zuena. Mendizorrotzan hasi zen, eta, besteak beste, Zaldiaran eta Arrieta gainak igo behar izan zituzten.

Denbora bikainak

Neska nagusien lehiari dagokionez, lau besterik ez ziren izan irteera puntuan. Adibidez, iazko txapeldunak, Alizia Olazabalek, ez zuen parte hartu. Alabaina, oso lehia polita ikusi zen Nerea Amilibia eta Oihana Azkorbebeitiaren artean. Amilibia lasterketaren buruan jarri zen segituan, baina hasieran tarte txikia ateratzen zion Azkorbebeitiari. 3 minutuko aldea lortu zuen, baina azken kilometroetan tarte hori murriztu egin zen. Azkenean, Amilibiak irabazi zuen 3:56:35 denborarekin. Bigarren Azkorbebeitia izan zen minutu eta 13 segundora, eta hirugarren Iratxe Etxebarria 4:58:51 denborarekin. Emakumezko beterano bakarra Inma Aldaz (ez dago federatua eta, beraz, ez zuen txapela jantzi) izan zen; bere denbora sei ordukoa izan zen.

Mutil nagusietan, berriz, Ionut Zincak eraman du txapela bigarren urtez jarraian. Maila honetan ere oso lehia estua bizi izan zen. Zincak denbora guztia egin zuen maratoiaren buruan, baina hurrengo lehiakideei oso alde txikia atera zien. Oso amaiera zirraragarria izan zen. Zincak 42 kilometroak 3:13:51 denboran bete zituen, eta bigarren sailkatuak soilik 9 segundora iritsi ziren. Eta pluralean esan dugu Fernando Etxegarai eta Mikel Rerizena denbora berean heldu zirelako: 3:14:00. Hauengandik 44 segundora helmugaratu zen Jose Felipe Larrazabal. Laugarren Asier Urdanpilleta izan zen (3:23:05), eta bosgarren Iñaki Lopetegi (3:28:29).

Beteranoek, bestalde, batez ere lehenengo sailkatuek, oso maila ona eman zuten. Irabazlea Jose Luis Albizuri izan zen 3:39:56 denborarekin; zortzigarren sailkapen orokorrean. Josean Estenaga bigarren postuan sailkatu zen 3:45:50 denborarekin, eta 10. sailkapen orokorrean. Eta hirugarren Lake Oiarbide izan zen 3:52:58 denborarekin.

Euskadiko Kopa

Gasteizko mendi maratoiak EMF-ren lasterketa ofizialen txanda ireki zuen, baina, ohi den legez, Txapelketak kide bat izango du alboan: Kopa. Joan den larunbatean aurkeztu zuten 2008ko Euskadiko Kopa, eta aurten lau probak osatuko dute.

Lehenengoa ekainaren 13an izango da: Izarraizko mendi lasterketaren laugarren aldia. Azpeitian jokatzen den lehia honek 21.200 kilometro eta 1.660 metroko desnibela ditu. Ekainaren 8an, berriz, Baigorrira egingo du salto: 13. Artzainen Lasterkaldia (21.800 metroko ibilbidea eta 1.410 metroko desnibela). Hirugarren proba uztailaren 6an jokatuko da. Zornotzan antolatutako lasterketa honek 27 kilometro eta 1.600 metroko desnibela ditu. Eta, amaitzeko, irailaren 27rako antolatu dute azken hitzordua Olaztin. Olazti-Urbasa mendi lasterketaren bigarren aldia da, 23.200 kilometrokoa eta 1.367 metroko desnibelekoa.