Lakuako Barne Sailak Bizkaian egindako lau atxiloketaren berri eman zuen atzo. Horietako hiru hiriburuan gertatu ziren, eta bikotekideei tratu txarrak ematea egotzita hartu zituzten gatibu gizonezkoak.

Igande goizeko zortziak aldera, Maiatzaren 2a kaleko etxebizitza batera joateko eskatu zioten Ertzaintzari. Senarra, VM.A.M., edanda etxeratu eta erasoka hasi zela azaldu zien emakumeak poliziakideei. Kristalezko edalontzi batekin buruan kolpatuta lortu zuen emakumezkoak ihes egitea eta laguntza eskatzea. Gizonak tratu txarrak eman ohi zizkiola kontatu zuen, eta, ertzainak joatean, berriz kolpatuko zuela gaineratu zuen. Gizonezkoak hilko zuela egin zion mehatxu emazteari poliziakideen aurrean. Gainera, haietako baten kontra oldartu zen.

Bigarren kasua geroxeago gertatu zen, goizeko zortziak eta laurdenean, Egaña kaleko etxe batean. Bizilagun baten deiaren ondotik bertaratu ziren ertzainak, eta gizonezko bat, J.S.L, eta emakumezko bat ikusi zituzten. Emakumeak azaldu zienez, etxera iritsitakoan bikotekideak gorputz osoan eta buruan kolpatu zuen ukabil itxiekin. Hainbat zauri zituen odol arrastoekin, eta hematomak aurpegian, buruan eta esku batean. Basurtuko erietxera eraman behar izan zuten.

Kale erdian

Atzo goizaldeko laurak pasata ziren Ertzaintzak Larrakoetxe kalean hirugarren gizon bat atxilotu zuenean: K.M., 30 urtekoa. Antza denez, eztabaida baten ondotik, bikote-lagunari eraso egin zion. Emakumea ospitalera eraman zuten zauriak sendatzeko.

Bizkaiko laugarren kasua Sestaon izan zen, igande goizeko hamaika eta erdiak inguruan. Ertzaintzak 23 urteko mutil bat, L.I.R., atxilotu zuen bikote-lagun izandakoari kalearen erdian laban batekin bizkarrean eraso egitea egotzita. Polizia autonomikoak adierazi zuenez, San Pedro Plazatik hurbil dagoen kale batean izan zen. Biktimak ertzainei azaldu zienez, eztabaida izan zuten, eta ondoren gizonak eraso egin zion armarekin. Emakumeak zauri bat zuen bizkarrean, eta herriko anbulatorioan artatu zuten. Erasotzaileak ihes egin zuen, baina 12.45ean harrapatu zuten Blasco Ibañez kaletik gertu.

Irunen ere izan zen atxiloketarik. 38 urteko gizonezko bat atzeman zuten askatasun sexualaren kontrako delitu bat leporatuta. Lakuako Barne Sailak azaldu zuenez, igande arratsaldean gertatu zen, 17.30ean. Hotel batetik hots egin zioten Ertzaintzari. Badirudi biktima telefono publiko batean solasean ari zela, eta gizonak atzetik hurbildu eta ukituak egin zizkiola. Emakumeak erasotzailea bultzatu zuen, eta honek zaplazteko bat eman zion. Jarraian, neska gaztea lasterka atera zen senarrari abisatzera.

Ertzainek erasotzailea bilatzeari ekin zioten hotel barrenean, eta aurkitu zutenean gatibu eraman zuten. Atxilotutako gaztea epailearen esku utzi zuten atzo goizean, polizia izapideak bukatu eta gero.