Abuztuaren 30a eta irailaren 6a bitartean Munduko Pilota Kontseiluak Txilen antolatu duen nazioarteko lehiaketa dela-eta, Euskal Herriko Pilota Konfederazioak (EHPK) eta Euskal Selekzioen Aldeko Iritzi Taldeak (ESAIT) gogor salatu dute Euskadiko Pilota Federazioaren jarrera. Beraien ustez, federazioak «ateak itxi dizkio» Euskal Herriko selekzioari eta bizkarra eman die, beste behin, Nafarroako eta Ipar Euskal Herriko pilotariei.

«Txilera doan selekzioa Euskal Herrikoa ez dela salatu nahi dugu. Hemeretzi pilotari eramango dituzte eta horietatik bakarra da Autonomia Erkidegotik kanpokoa, neska nafar bat. Gainera, txapelketa hau trinketean jokatuko da eta Euskal Herrian dauzkagun trinketeko pilotaririk onenak Iparraldekoak dira», argitu du Martin Ibarra, EHPK-ko ordezkariak.

Ibarraren hitzetan, arazorik «larriena» Euskal Herriari bidea ixten diotenak etxeko agintariak beraiek izatea da. Zehazki, Txema Aldamiz, Euskadiko Pilota Federazioko presidentea, eta Carlos Lasa, Munduko Pilota Kontseiluko presidentea, aipatu zituen errudun nagusitzat. Gogoratu zuenez, bi agintariok izan ziren iaz EHPK Munduko Pilota Kontseiluan sartzea eragozteko indarra egin zutenak.

Horregatik, pilota munduko jendeari gogoeta egitera bultzatu zion «zer ordezkari ditugun» ondo hausnartzeko, nahiz eta argi utzi EHPK-k ez duela «aterik ixten» eta Kontseiluan sartzeko eskaera «oraindik indarrean» dagoela. Konfederazioaren ustez, «indarrak elkartzea» da aurrera egiteko bide bakarra.

Ixiar Arratibelek ere, ESAITeko ordezkariak, Euskadiko Federazioak «euskal pilotari batzuen eskubideak zapaltzen» jarraitzen duela salatu du, Ipar Euskal Herriko eta Nafarroako pilotariak «ez baititu kontuan hartzen». Horren aurrean, selekzioen aldeko taldeak federazio nazionalak ezinbestekotzat jo ditu «nazio gisa aritzeko».