Egutegiaren poderioz, Zinemaldiaren hasiera hurbiltzen doan heinean, gero eta xehetasun gehiago ezagutzen ari dira. Jakinak dira, esate baterako, jaialdia zabaldu eta itxiko dituzten filmak. Antolatzaileek aurpegi ezagunez betetako bi lan aukeratu dituzte bi ekitaldi hauetarako. Hilaren 18an izango den inaugurazioan, Britania Handiko «The Other Man» ekoizpenak irekiko du aurtengo Zinemaldia. Liam Neeson -«Schlinder's List» pelikularengatik Oscar sarirako hautagaia-, Antonio Banderas eta Laura Linney antzezleak Richar Eyreren zuzendaritzapean ikusteko aukera izango da. Hiru erpineko amodioren nondik norakoak deskribatzen duen lan hau, beti ere intriga handiz josita, Bernand Schilink idazle alemaniarraren «Liebesfluchten» liburuan oinarritzen da.

Amaiera ekitaldian, ordea, «Brick» miretsiaren zuzendariaren bigarren lana izango da, hots, «The Brothers Bloom». Komedia honetan, genero nahasketa bitxi baten bidez, Bloom anaia iruzurtien abenturak jarraitu ahalko dira. Horretarako, Oscar sariaren jabe diren Adrien Brody -«The Pianist» filmeko protagonista- eta Rachel Weisz -«The Constant Gardener»ekoa- antzezleek parte hartu dute.

Sail Ofiziala

Urrezko Maskorra lortzeko lehian, aurretik iragarrita zeuden hamahiru filmei beste bi gehitu zaizkie: «Maman est chez le coiffeu» eta «Louise-Michel». Léa Pool zuzendariaren azken lana dugu lehena. Kanadatik datorren artista honen «Lost and Delirios» (2001) eta «The Blue Butterfly» (2004) filmak azpimarra daitezke, besteak beste. Sail Ofizialeko hamabosgarren partaidea Benoît Delépine eta Gustabe Kervenek idatzi eta zuzentzen duten «Louise Michel» komedia beltza da. Estatu frantsesetik datozen bi zuzendari hauek emakume langile matxinoek eragindako lan doikuntzaren ondorioei umore beltzez ekiten diete, abentura erdi anarkista eta erdi burlatia azalduz.

Baina bi lan hauek ez dute erraz izango Urrezko Maskorra lortzea, aurtengo edizioan kalitate handiko Sail Ofiziala osatu baita. Japoniatik, Horikazu Kore-eda jaialdira itzuliko da «Aruitemo, Aruitemo» lanarekin. Kim-Ki-duk lehenik parte hartuko du Sail Ofizialean «Bi Mong»ekin. Samira Makhamalbaf iraniarrak bere laugarren lana, hots, «Two-Legged Horse» aurkeztuko du; Turkiatik Yesim Ustaoglu iritsiko da «Pandora's Box» filmarekin eta Rashid Masharawiren palestinarraren «Eld milad Laila» lana ekarriko du.

Ameriketatik bi proposamen heldu dira aurten, bata Estatu Batuetatik eta bestea Argentinatik. Courtney Hunten lehen lanaren -«Frozen River»- alboan Daniel Burman beteranoa dator bere «El nido vacío». Danimarkatik Kristian Levringen «Den du Frygter» lana dator eta Britania Handitik Michael Winterbottom, «Genova»rekin. Estatu frantsesari dagokionez, zuzendari ospetsuenetako bat lortu du Zinemaldiak, Christophe Honoré, eta «La belle personne» erakutsiko du berak. «Camino» (Javier Fresser), «El patio de mi cárcel» (Belén Macías) eta «Tiro en la cabeza» (Jaime Rosales) izango dira, azkenik, estatu espainoletik etorriko direnak.

Sail Ofizial honen epaimahaiko lehendakaria Oscar bat irabazi duen Jonathan Demme izango da. Zuzendari honek «Rachel Getting Married» eta «Neil Young Trunk Show: Scenes from a Concert» lanaren amaitu gabeko bertsioa aurkeztuko ditu.