GARA |

Euskal Herriko dantza eta folkloreari ekarpen handia egin dion Gene Yurre dantzari eta koreografoa hil da, Kresala dantza taldearekin egindako 40 urteko ibilbidea azaltzen duen liburua aurkeztu den aste berean. «Tradizioa, sormen iturri» liburuan, besteak beste, Yurreren bizitzari buruzko pasarte asko azaltzen dira, Ukrainako ballet kosakoetan emandako urteak edota Euskadiko Ballet Nazionalaren sorreran egindako lana.

1928. urtean jaioa, gerra garaian herbestera joan behar izan zuen, Parisera hain justu, eta han hasi zituen dantzari ikasketak. Théâtre Du Châleteten aritu zen dantzari lehendabizi eta, handik gutxira, Irina Grjebina ballet errusiarrean egon zen. Talde honekin mundu osoan zehar bidaiatzeko aukera izan zuen, eta horrez gain, Ukrainako ballet kosakoaren ateak ireki zizkion. Munduan barrena ibili ondoren, ordea, 1968an Euskal Herrira itzultzea erabaki zuen. Garai hartan, Kresala dantza taldea sortu eta bere lehenbiziko zuzendari bihurtu zen. Handik aurrera, euskal dantza munduan murgilduta eman zuen bizitza osoa. Euskadiko Ballet Nazionalaren hasierako antolakuntza taldean aritu zen. Bere koreografialanik esanguratsuenak 1972an egindako Iruleak eta Maskarada eta 1983an aurkeztutako Loiak dira, besteak beste. Jaiotako hiri berean zendu da Gene Yurre, 80 urte zituela. Euskal dantzak ez du bere irudia ahaztuko eta aste honetatik aurrera Kresalak argitaratutako liburuan nahi duenak bere ibilbidearen xehetasunen berri izan dezake.