Murciaren aurka lortutako garaipen ikusgarriak Alavesen goranzko bidea sendotu zuen. Bide batez, gasteiztarrak sailkapenaren erdialdean kokatu zituen.

Denboraldiak laster beteko du lehen laurdena, baina, zuri-urdinek, gainontzeko taldeek bezala, ekainera arte izango dituzten helburuak lehenbailehen argitu nahi dituzte nahiko adierazgarria izan ohi den «muga» hori gainditu baino lehen. Gaurko partida erabakigarria izan daiteke horretarako, Alavesek etxetik kanpoko lehen garaipena lortzeko aukera izango baitu arerio oso indartsu baten aurka.

Taldearen egoera ikusita, gaur emaitza txar bat lortzeak ez lituzke ondorio larriegiak izango: Salmeronen taldeak sailkapenaren erdialdean jarraituko luke eta Mendizorrotzan erakusten ari den sendotasuna kontutan hartuta, aurreko urteetako arazoak berriz ere izateko beldurra ez luke izan behar.

Garaipena lortuz gero, berriz, panorama ederki aldatuko litzateke Alavesentzat. Izan ere, igoera postuetatik gertu amaituko luke jardunaldia, Hercules bera gaindituz; horrenbestez, denboraldiaren lehen laurdenaren muga Bigarren Mailako talderik onenekin borrokan igaroko luke. Partida eta etsaiaren zailtasuna, beraz, eskura daitekeen sariaren parekoa da oraingoan gasteiztarrentzat.

Alavesek etxetik kanpora ibilbide batere ona ez daraman arren, morala topera du. Oso argigarria da Jose Maria Salmeron berak bidaiatu aurretik esandakoa, batez ere entrenatzailea normalean zein apala izaten den kontutan hartuta. «Oso sentsazio onak dauzkat -adierazi zuen andaluziarrak-. Hercules etsai gogorra da, baina moralez eta konfiantzaz gainezka gaude. Azken partidan eta aste honetan zehar taldea gustura, eroso, dagoela ikusi dut. Hori dela eta, gutxienez, puntu bat lortzeko gai dela uste dut».

Herculesek ere gogoz ekingo dio norgehiagokari. Izan ere, joko bikaina egiteaz gain, emaitza oso onak lortzen ari dira -oraindik porrotik jaso ez duen Bigarren Mailako talde bakarra da-. Hala ere, Juan Carlos Mandia entrenatzailearen ustez konfiantza ez da nahikoa izango Alaves gainditzeko. «Oso talde arriskutsua dela uste dut -esan zuen Mandiak-. Alde batetik, sekulako zorroztasun taktikoaz aritzen da eta, bestetik, jokalari indartsuak dauzka atzealdean eta arriskutsuak aurrealdean».