Hitzordu garrantzitsuari ekingo dio gaur Portlandek 20.00etatik aurrera Iruñean. Partida gogorra izango da, aurkaria zaila izateaz gain berezko arazoak ere baditu-eta talde nafarrak.

Ohitura bilakatu da, zoritxarrez, eta San Antoniok hutsune eta arazo fisiko ugari dituela ekingo dio partidari gaurkoan ere. Davor Dominikovicek eta Lars Jorgensenek ezin izango dute jokatu; Juancho Perezek eta Malmagrok aulkian emango dute kantxan baino denbora gehiago; eta Nikolic eta Santi Urdiales jokatzeko prest egongo diren arren kili-kolo dabiltza.

Horrez gain, aurkari zaila dute oraingoan. Chehovskie «Errusiako selekzioa da ia-ia», Cechu Villaldearen esanetan. «Sekulako taldea da. Bi metrotik eta ehun kilotik gorako jokalariak ditu eta nekez hartuko diegu aurrea, presentzia fisikoa falta baitzaigu, Ciudad Realen ikusi genuen bezala. Fisikoki ezin gara beraiekin lehiatu; arinagoak eta azkarragoak izan beharko dugu, beraz, hauek menderatzeko».

Ezinbesteko helburua da hori hala ere, oztopo guztiak ahaztuta, hurrengo fasea kolokan baitago iruindarrentzat. Azken bi partidak galdu ondoren, Portland E multzoaren hirugarren postuan dago eta gaur liderraren aurka galduz gero, Steaua Bukaresten eta Cimos Koper Iruñean gainditu beharko lituzke nahitaez.