Bart Wellensek ezustekoa eman zuen atzo eta Asteasuko ziklo-krosa bereganatu zuen, Sven Nys menperaturik. Bi flandestarren arteko lehia ederra izan zen atzo Eizmendi auzoan eta aspaldiko partez faborito nagusiak huts egin zuen.

Parte-hartzea bikaina zen irteeran eta atzerritarrek onenak eman zituzten lasterketan zehar, hau da, Wellensek, Nysek, Vantornoutek, Vanthourenhoutek, Stybarrek, Aernoutsek eta Moureyk; Vervecken, berriz, ez zen azaldu. Berriro ere, euskaldunek oso urrunetik ikusi zituzten lehendabiziko postuak.

Vantornout bizi hasi zen, bezperan Igorren bezala, baina ez zuen behar adinako surik zangoetan. Nys, ordea, lasai xamar atera zen eta aurkariak buruan tartekatu ziren.

Hirugarren itzulian, Nysek erritmoa bizitu zuen, eta Wellensek eta Stybarrek besterik ez zuten txapeldunaren gurpila harrapatu. Ibilbide teknikoan, Wellensek eta Nysek dohainak atera zituzten eta besteak nabarmen utzi zituzten atzean. Ustekabea Zaballa kantabriarrak eman zuen lehendabiziko itzulietan, onenen artean lehiatzen, eta probaren burua ere hartu zuen. Edonola ere, nekea sumatu eta atzera egin zuen.

Stybar, Vanthourenhout, Vantornout, Aernouts eta Mourey txirrindulariek hirugarren postua izan zuten jomuga.

Nysek ez zuen bakarrik hanka egiteko adinako alderik lortu, Wellens ezin hobeto moldatu baitzen. Hortaz, batera egin zuten azken itzulian, eta esprint ikusgarrian Wellensek garaipena erdietsi zuen maldan gora.

Nysen hainbat urteko nagusitasunak Wellensen ibilbidea ilundu du, batez ere azken denboraldietan, txirrindulari ona den arren. Izan ere, bi aldiz izan da munduko txapelduna eta atzo agerian utzi zuen maila.

Euskaldunen artean ere, ezustea eman zuen Murgoitio bizkaitarrak, Seco eta Yus menperatu baitzituen.