Ospe handiko Gipuzkoako pilotaleku bat, Hernaniko Galarreta, maila altuko lau erremontista nafarren arteko final handiaren topaleku bihurtuko da gaur, 16.45etik aurrera. Izan ere, inork galdu nahiko ez lukeen partida entretenigarri horietako bat dakarkigu erremonteak: Ezkurra-Gaztelu eta Urriza-San Miguel kirolarien arteko Binakako Txapelketako final ikusgarria.

Lehiaketa honetako fase guztiak jokatuta, esperientziak eta gaztetasunak elkar ikusiko dute gaurko finalean txapel preziatua eskuratzeko lehian. Alde batetik, Ezkurra-Gaztelu bikoteak beteranotasuna ekarriko du Galarreta pilotalekura, Doneztebeko aurrelariaren ibilbidea kontuan hartuta. Leitzako atzelaria, aldiz, txapelketako debutaria da, baina oso maila ona erakutsi du azken partidetan. Bestetik, Urriza eta San Miguel erremontista gazteek, euren irabazteko desiren bidez, ahalegin guztiak egingo dituzte bikote aurkariaren jokoa gailentzeko.

Baina, norgehiagoka hasi baino lehen, badirudi dena aurka dutela gazteek. Apustuak Ezkurra eta Gazteluren alde daude eta, gainera, Ezkurrak hiru txapel lortu ditu (1994koa, Eizagirrerekin; 1999koa, Imazekin; eta 2006koa, San Miguelekin).

Jokoari dagokionez, Ezkurra-Gaztelu bikotearen erremonte polita eta ikusgarria espero da gaurkoan. Doneztebeko aurrelariak, gainera, txapela eskuratzeko gosez dago txapelketako saririk lortu gabe bi urte egon ondoren.

Errebelazioak

Dena den, ez pentsa dena irabazita dutenik Ezkurrak eta San Miguelek. Aurrean txapelketako errebelazioak edukiko dituzte. Erremonteko «bi dorreak» (1,90 metroko altuera baino gehiago dute biek) oso lehiakide bikainak izango dira, hasieratik buruan izan duten gauza bakarra eskuratu nahian: txapela.