Egunak pasa ahala, datorren maiatzaren 13an Athleticek eta Bartzelonak Valentziako Mestalla futbol zelaian jokatuko duten Kopako finalak zale zuri-gorrien artean sortu duen ikusmina marka guztiak hausten ari da. Talde barrutik finala iritsi arte lehentasunekoa Liga dela behin eta berriro errepikatu duten arren, atzoko egunak bi erdigune informatibo izan zituen eta biak Kopako finalarekin zuten zerikusia.

Alde batetik, finala bertatik bertara ikusi nahi duten bazkideentzat sarreren zozketan izena emateko epea ireki zuen Athleticek. Era askotan eman daiteke izena: taldearen webgunean eskegita dagoen eskaera orria beteta, 94-405 05 15 telefono zenbakira deituta, edota San Mameseko txarteldegietan bazkide txartela erakutsita. Kontuan izan behar da 14.800 sarrera zozketatuko direla eta Athleticeko bazkide kopurua 34.373koa dela azken datuen arabera.

Bertan jokatuko balitz bezala

Bestalde, Mestallan egon ezingo duten zaleek San Mames leporaino beteko dute. BBKren eskutik, hainbat pantaila erraldoi ipiniko dituzte Bilboko futbol zelai mitikoan, eta bertan egoteko sarrerak ere atzo ipini zituzten salgai. Goizeko hamarrak aldera hasi zen salmenta bulegoetan, kutxazainetan eta Internet bidez, eta hiru ordu eskasean, salgai jarritako 35.000 sarrerak salduta zeuden. Izan ere, beharrezkoa den azpiegiturak eta segurtasun hesiak direla-eta, 35.000 ikuslera mugatu behar izan dute normalean 40.000 ikusle batzen dituen futbol zelaia. Sartu ezinik jende asko geratuko da.

Koparen berri sorta ez da hor amaitzen. Galdakaoko Udalak jakinarazi zuenez, Bizkaiko herri horretan ere pantaila erraldoi bat ipiniko dute jendeak neurketa bertatik ikus dezan. Oraindik lekua zehaztu gabe dagoen arren, datozen egunetan festa horren nondik norakoak zehazten joango dira.