Kaskoak soinean, goizeko ia bostak zirenean ekin zioten Baigorriko Espeleologia Klubeko kideak Korrikari. Aurreko Korrikaren edizioetan bezala, aurten ere, kilometroa erostea erabaki dute, ekimen horrek sustatzen duen «ideia ederrarekin» bat egiteko.

Asko dira Euskal Herrian, Baigorriko Kluba bezala, bi urtetik behin zazpi herrialdeak zeharkatzen dituen euskararen aldeko lasterketarekin bat egitea erabakitzen dutenak. Horrela, Baigorriko espeleologoak ere ekimen horretan kilometro labur bat ibiliz, beraien erara, «kirola eta euskara» aldarrikatu nahi izan dute.

«Kirol talde bat izaki, polita iruditzen zaigu kirol ekimen baten bidez gure hizkuntza eta kulturari atxikimendua adieraztea», nabarmendu zuen Serge Planès Klubeko kideak. Elkartasuna, trukaketa eta adiskidetasuna Klubarentzat ideia bazterrezinak dira, eta AEK horien eramaile ezin hobetzat jotzen dute.

«Ez gara militanteak, baina, gutariko zenbaitentzat garrantzitsua da Korrikaren filosofiarekin bat egitea, eta gure hizkuntza eta kultura sostengatzea. Elkarte gisa 1901eko legeari jarraitzen diogu eta AEK-k ere bai», gehitu zuen Klubeko kideak. Lurpeko gizon eta emakume horiek, beraien jardueraren ezaugarri nagusiarekin, hau da, espeleologoen kasko eta argiekin heltzen diote Korrikaren lasterketari. «Aurten oraindik ikusgarriagoak, Baigorritik gauez igaro baita».

Leize edota lurpeko bazterrak arakatzen dituen Kluba bera baigorriarrek sortu zuten, eta kide guztiek bertako edo inguruetako herritarrak jarraitzen dute izaten. Bertakoak izaki, Planesen hitzetan, «naturaltasun osoz» lotzen da Kluba Korrika bezalako ekimen bati. «Nafarroa Beherea eta Zuberoan gaudelarik, naturaltasunez bat egiten dugu Korrikarekin. Berrogei kide gara, eta, nehork ez du zalantzan jarri parte-hartze hori», gehitu zuen.

Korrikan parte hartzearekin batera, Baigorriko espeleologoen Klubak, euskararen aldeko atxikimendua erakusteaz gain, urrunago joateko asmoa du. «Lekuko Bai Euskarari elkartea gurekin harremanetan jarri zen, eta gure dokumentuak euskaraz itzultzea proposatu ziguten», nabarmendu du espeleologo Klubeko kideak.

Klubaren barne dokumentu guztiak euskaratuko dituzte, beraz. Tartean, Korrika bezalako ekimenekin bat egiten jarraituko dutela ere goraipatu zuen Serge Planes espeleologoak.