Mouss eta Hakim Amokrane anaiak aspaldi dabiltza beraien kabuz kantuan, Zebda atzean utzita, eta gaur «Origines contrôlées» (Atmospheriques, 2008) lana aurkeztuko dute, Gazte Martxako azken txanpan.

Disko berria Serge Lopez eta Manu Vigourous (gitarrak), Jean-Luc Amestoy eta Lionel Suarez (soinuak), Julien Costa (bateria), Julien Talavera (baxua) eta Rachid Benallaoua (mandolina) musikarien laguntzaz grabatu dute eta Frantziara lanera joandako Magrebeko etorkinak omentzen ditu, Aljeriako poeta kantariek Pariseko Barbes eta Pigalle auzoetan 40ko eta 70eko hamarkaden artean sortutako hamahiru kanturen bitartez.

Zebdako abeslari ohiez gain, eskarmentu handiko taldeek joko dute Garazin. Madrilgo Def Con Dos taldea bata, orain gutxi errepidera itzuli dena, «Hipotécate tú» lan berriarekin. Euskal herritarrak dira beste guztiak: Su Ta Gar Eibarko heavy taldea hogeigarren urtemuga ospatzen ari da, MAK komandoa «Hauts eta Errauts» arituko da rap doinuetan, eta Iruñerriko Kasu! taldeak «Beldurrik ez» du agertuko. Bukatzeko, Gatibu rock taldeak ordezkatuko du jaialditik at geratu (edo atera) den Delorean dantza laukotea. Eta gaua heldu aitzin, festa izango da nagusi egunean zehar, ekitaldi ugarirekin.