Gernikak mendeetan atzera egin eta Erdi Arora egin du salto asteburu honetan. Ostiralean hasi eta gaur arte, makina bat ikuskizunez gozatzeko aukera izan dute gernikarrek eta merkatuaren aitzakian herrira etorritako bisitariek.

Adin guztietako jendeari zuzendutako ekintzak eskaintzen ari dira, baina betiko moduan etxeko txikienak dira protagonista nagusi.

Zirku-eskola da aurtengo ekimen nagusia eta, besteren artean, malabaristen eta trapezisten ikuskizunak antolatu dituzte.

Dena den, azoka, ikuskizun gune izateaz gain, salmenta gunea ere bada, eta 70 bat sal-mahai daude. Besteak beste, bitxiak, larruz egindako produktuak, zeramika-lanak, otzarak, olioa, lurrinak, jantziak eta zapatak aurki daitezke horietan.

Hain justu ere, Gernikako Udalak iragarri du datorren hilabetetik aurrera larunbateroko merkatu berezi monografikoei ekingo zaiela. Hala, Busturialdeko artisauak eta gonbidatutako ekoizleak izango dira protagonista.