Ekainaren lehenengo asteburuan Larrabetzura doa euskal literatura, asteburu pasa, bertan sortu Literatura Eskolaren gonbitari erantzunda.

Orain dela bost urte «irakurtzen ikasteko eskola» sortu zuten Larrabetzun, eta gerora Euskal Herri osoan hedatu. Sarea gehiago hedatu nahian baina, «bost urtetan hartutako eduki hori guztia konpartitzen hastea» erabaki dute orain, «euskal literaturaren eragileekin» batez ere zuzenenarekin, irakurlearekin berarekin, Gotzon Barandiaran idazle eta eskolako kidearen arabera. Horretarako, eta Eskolak ulertzen duen moduko «euskarazko literaturaren azokarik ez dagoenez», bilgune legez, «Literaturia» sortzea otu zaie, «bakarrik euskarazko ekoizpenaz eta bakarrik literaturaz» arduratuko dena.

Literatura Eskolaren proposamena gogo onez eta eskuzabaltasunez jaso zuten herriko elkarteek, eta lan talde polita osatu: Larrabetzuko kultura batzordea, herriko liburutegia, Arrekikili euskara elkartea, Hori Bai gaztetxea, Txinpasmendi guraso elkartea, Azoka elkartea (herriko nekazari eta ekoizleek eta erosleek sortua) eta larrabetzu.org ataria. Herritik landa ere, Txorierri eskualdeko euskara elkarteen babesa jasoko du ekitaldiak, baita Topagunearen, Euskarabila (Basauri) eta Mikelazulo (Errenteria) elkarteena ere.

Eskolatik plazara, atariz atari

«Euskarazko literatura eta irakurzaletasuna bultzatzeko eragileen arteko elkarlanean», idazle, editore eta argitaletxeen parte hartze zuzena izango du -zerrenda hazi eta hazi ari da- eta urte hasieratik ekaina bitarte plazaratutako liburuak eramango dituzte bertara.

Herriko elkarteen lanaren lagin gisa, Txinpasmendi guraso elkarteak antolatu duena. «Oso gustura hartu genuen proposamena», esan zuen ordezkari lanak egin zituen Ines Serranok. «Literatura kalera ateratzeko eskolatik ere umeen parte hartzea bultzatu dugu, eta beraien ideia eta asmoak jaso, antolatu eta plazaratuko ditugu asteburu osoan zehar». Umeek sortu eta egindako ekimenak dira: asmakizun jolas, antzezpen, errezitaldi musikatu eta beste.

Eta adibideekin jarraituz, beste ekimen arras interesgarri bat, larrabetzu.org atariak antolaturiko «Blogak & letrak». Ekimenak «Literaturia» Larrabetzutik sarera eta saretik mundura zabalduko du. Patxi Gaztelumendik «literatura ez da soilik kontsumorako gai» argitu eta «edukiari erreparatuta, literaturaren oinarri diren letrak oinarri hartuta, hizkuntzaren zentzua direnak, proposamenak aurkeztu ditugu», azaldu zuen. Liburuetatik landa, «Larrabetzutik baino, literaturaren inguruan idazten duen euskarazko blogosferatik, letrak eta blogak izango ditugu hizpide, deskonferentzien bitartez -hitzaldi labur eta parte-hartzaileak-».