Jokoa eta jokalarien sasoia bihurtu dira Osasunarentzat Lehen Mailan jarraitzeko oztopo nagusiak. Eskuragarriak ziren bost partidetan puntu bakarra lortuta, Sevillaren, Bartzelonaren eta Real Madrilen aurka bi garaipen lortu beharrean dago orain.

Iruindarrak gaur itzuliko dira entrenamenduetara Getafeko partidak utzitako moral zauritua sendatzeko helburuarekin. Gorritxoek joko negargarria egin zuten Iruñetik joandako 1.500 jarraitzaileren aurrean. Adibide gisa, jokalari batzuk barkamen eske joan ziren harmailetara, zaletu gorriek erantzunik izan ez zuen erakustaldia egin zutelako bertatik: azken hogei minutuak isildu gabe, taldea animatu nahian, dagoeneko markagailuak 3-0 emaitza erakusten zuela.

Aldageletan ere nabaria da egonezina eta Camacho eta jokalarien arteko distantzia. Entrenatzaileak epaileak erabili izan ditu aitzakia gisa azken partidetan, baina kontrako norabidean doa Krutxagaren eta Puñal kapitainen diskurtsoa. Errua jokalariei ere leporatu izan die Camachok, inolako autokritikarik egin gabe.

Kirol arloan, argi dago zein izango den Camachoren plana: Nekounam eta Sergio itzuliko dira hamaikakora, azken hau zigortuta egongo den Miguel Flañoren tokia betetzeko. Zailagoa izango du Natxo Monrealen hutsunea betetzea. Aukera bakarra Getafen egindakoari berriz heltzea da: Javier Flaño bertan jarri edo hau eskuinean kokatu eta Azpilikueta ezkerrera pasa. Juanfran ere hamaikakora bueltatu daiteke Hidalgoren ordez, eta ikusteko dago Masoud ere goian sartzen ote duen. Zaleak ere nahiko kezkatuta daude Roberto atezainak 2-0ekoan egin zuen akats handiarekin, eta oro har ematen duen segurtasun faltarekin, baina ez dirudi hiru norgehiagoka falta diren unean toki horretan aldaketa egongo denik.

Sportingekiko duten bi puntuko aldea oso eskasa zaie gorritxoei. Izan ere, goal-average galdua du Osasunak, eta ondorioz, Sportingek partida bat irabazten badu, Osasuna irabaztera behartzen du, eta berdinketarik ez du nahikoa izango. Norgehiagoka errazagoak ditu Sportingek: Malagaren aurka etxean, gero Valladoliden jokatu behar du, eta Recreativorekin Molinonen. Horietatik bi irabaziko balitu, Osasunak gutxienez bost puntu beharko lituzke.

Azken hiru partidak

Txanponaren beste aldea Osasunari geratzen zaizkion hiru neurketetan dago. Izan ere, Sevillak eskura du Champions-erako txartela, eta asteburuan bertan lor lezake matematikoki, baina balizko porrot batek ez luke dena pikutara bidaliko.

Bartzelonari dagokionez, Liga hurrengo astean irabaziko duela ematen du, eta kasu horretan Guardiolak zera iragarri zuen igandean: Osasunaren aurka B taldeko jokalariak jar ditzakeela, Champions-eko finala hortik lau-bost egunetara jokatuko baitu. Alves eta Abidal izan litezke Osasunaren aurka arituko diren titular bakarrak, biak finala jokatu ezinean daudelako, Londreseko finalerdian jasotako txartel gorrien ondorioz.

Azkenik, Real Madril bisitari izango du Camachoren taldeak. Begi bistakoa da talde honen gainbehera azken partidotan. Denboraldi bukaera duina egiteko eskatu zien atzo presidenteak, baina jokalariek argi uzten dute beraientzako bukatu dela.