Iran, Brasil, Venezuela, Katalunia eta Euskal Herriko doinuak entzun ahal izan ziren atzo Eskoriatzan, Mundumiran, Munduko Kulturen Jaialdian. Musikaz gain, ikuskizunez gozatzeko eta jaki exotikoak dastatzeko aukera ere izan zen.

Herriko bazterrak artisauen postuz beterik daude egunotan Eskoriatzan; arropaz, bitxiz edota dekoraziorako eskulanez atondutako postuak.

Mundumirako lehen egunean, ostiralean, jende andana igaro zela aipatu zuten artisauek, baina gehienak bisita besterik ez zutela egin. Atzo ordea, mugimendua oso bestelakoa zen eta salmentaren bat edo beste izateko esperantza azaldu zuten.

Tarteka mokadutxoren bat egiteko aukera ere badago, gastronomiaren usaina Eskoriatzako kaleetan herrian sartu orduko nabaritzen baita. Izan ere, Munduko Zaporeak gunean bost kontinenteetako jaki exotikoek ere badute posturik. Hala nola kebab-ak, falafel eta krepeak dastatzeko aukera dago. Euskal Herriak ere badu presentziarik munduko jaian eta, nola ez, Segurako talogileak bertan izan ziren beroari aurre eginez. Halere, «horrelako jai polit bati ezin diogu hutsik egin», aipatu zuten.

Goizetik hasi eta gauera arte luzatu zen atzo jaia, aurtengo Mundumirako izar handi batekin, Macacoren kontzertuarekin, alegia.

Eguerdian Amama Luisa Brass Band fanfarreak alaitu zituen kaleak. Talde durangarrak, 1920ko New Orleanseko kale-orkestren musikaren gisako doinuak eraman zituen Eskoriatzara. Senzala Euskadi Capoeira taldea ere kalez kale ibili zen «umeentzat, gazteentzat eta helduentzat» diren doinuak zabaltzen eta taldekideek ozen oihukatu zuten bezala baita «parte hartzeko giroa jartzen» ere.

Mundumira agertokian, bien bitartean, Romina Goshtasbi irandarrak, bost dantzari alboan zituela, dantza pertsiarraren erakustaldia eskaini zuen, herriko plaza txiki utziz.

Bazkalondoa erritmo alai eta dantzagarriekin igaro zuten bertaratutakoek, samba latindar doinuak nagusi izan baitziren Ras Miguel & Tafari eta Bloque 53 venezuelarren eskutik. Uruguaiko Candomberen txanda izan zen ondoren. Hogeita hamar danbor-jole eta dantzarik animatutako kalejiran ibili zen kultur elkartea, herriko kaleetan zehar.

Macaco, gauean

Jaialdiko izar nagusiaren eguna ere izan zen atzokoa, Macacorena hain zuzen ere. Gauerditik aurrera «Moving» abestia lehenengo single duen «Puerto Presente» bilduma berria aurkeztu zuen. Dudarik gabe, atzoko egunaren arrakastaren arrazoietako bat izan zen artistaren emanaldia. Pentsa, artisauek ere hura ikusteko postuak itxi, eta ondoren berriz zabaltzea ere pentsatua zuten goizean.

Gaurkoa izango da jaialdiaren azken eguna, baina bizitza ulertzeko modu asko ekartzen dituen munduko kulturen topagunea hurrengo urtean itzuliko da Debagoienera, bere seigarren edizioan.