Joan den urtean ganadu feria uztailaren 10ean ospatu zen; aurten, berriz, uztailaren 7ra aurreratu dute. Bigarren urtez Iruñeko Agustinos industrialdean egin da, eta 1.400 abelburu bildu dituzte. Eguerdirako horietatik 659 salduak ziren dagoeneko.

Udalak egindako balorazioaren arabera, onuragarria izan da feria uztailaren 7ra aurreratu izana, bai salmentei dagokienez, bai bertara gerturatu den jendetzagatik. Horrenbestez, hurrengo urteko feria ere egun horretan egingo dela adierazi dute. Erabilitako lekua ere berria da; aurten Eroskiko aparkalekua erabili dute eta badirudi onerako izan dela, bertan aparkatzeko leku gehiago baitago.

Hornikuntza

Guztira 230 korta prestatu zituen Iruñeko Udalak, eta, esan dutenez, eskas geratu ziren bertara eramandako abere kopuruarentzat. Egunerako dena prest egon zedin, Udaleko 10 langilek 900 hesi baino gehiago jarri zituzten, guztira 2.700 metroko hesia osatzen zuen ganaduarentzat prestatutako lekuak. 10 langile horiez gain, goiz osoan 8 langile aritu ziren bertan ziren baserritarren eta jendearen beharrak asetzen.

Bestalde, arduradunen esanetan, aurten osasun instalazioak ere hobetu dituzte, eta taberna ere jarri dute. Zaldi azoka da Iruñekoa; bertan zaldiak, moxalak eta astoak aurki ditzake bisitariak. Debekatuta dago beste edozein animalia eramatea eta salmenta. Lizentziarik gabeko salmenta ere debekatuta dago, beraz, ez dago edaria zein janaria nork bere kabuz saltzerik. Abereak azoka eremura gaueko hamabietatik aurrera sar zitezkeen eta goizeko zazpietan eman zioten hasiera ekitaldiari.