Adin txikiko bat hil zen atzo goizean Cabanillasen (Nafarroa) jaietako entzierroan kolpe gogor bat jaso ondoren. Ohitura duten gisan, jaiak izanik, goizeko bederatzietan entzierroa egin zuten herriko kaleetan.

Atzokoan ordea, festarako aitzakia izaten den ekitaldia tragedia bihurtu zen Cabanillasen, A.M.A. 16 urteko gaztearen heriotzaren ondoren. Dagoeneko ibilbidea egina zutenean, soilik bigantxak geratzen ziren plazan. Horiek abeltegietara sartzeko, ordea, berriro idi bat askatu zuten.

Orduan, gazteak, bigantxengandik ihesi zebilela, ezustean animaliarekin aurrez aurre topo egin eta bularraldean kolpe gogorra jaso zuen. Gaztea harrapatua izan ondoren zutik jarri eta hesira hurbildu zen arren, zerraldo erori zen lurrera. Bertan zeuden erizainek artatu zuten lehenbizi. Jarraian, Tuterako Reina Sofia ospitalera eraman zuten, eta bertan suspertzeko saiakerak egin bazizkioten ere, handik gutxira zendu zen. Cabanillaseko alkateak adierazi zuenez, bestalde, «herriko peña bateko kide zen gaztea eta entzierroen zale amorratua zen».

Gertatutakoaren ondotik, herriko alkate Ana Maria Rodriguezek (PSN) adierazi zuenez «ez zen inolako segurtasun akatsik izan entzierroan». Haren ustez «hainbat ezaugarrik bat egin zuen, baina guztia arauen arabera prestatuta zegoen: bertan ziren zezenketetako zuzendaria, anbulantzia eta mediku taldea».

Herriko Udalak jaietako ekitaldi guztiak bertan behera uztea erabaki zuen berehala. Hala, gaur eguerdira arteko dolua deitu zuen atzo. Adin txikikoaren hiletaren ondoren, jai egitarauarekin jarraituko dutela argitu zuen Rodriguezek.

«Arauak betetzen zituen»

Halako ekitaldietan adin txikikoen parte-hartzearen gaineko eztabaida piztu da berriro atzokoaren ondoren. Hala ere, Cabanillaseko Udalak argitu zuenez, zezenketen ikuskizuna gauzatzeko Nafarroako Gobernuko Barne Saileko baimena zuten, legez jasotzen diren arauak betetzeko baldintzapean. Juan Ramon Rabade sailburuak aditzera eman zuenez, «ikuskizunak egiteko baimena zuten Cabanillasen, eta jaiak normaltasun osoz ari ziren ospatzen».

Nafarroan 16 urtez azpikoek debekatua dute gisa honetako ekitaldietan parte hartzea. Rabadek berretsi zuenez, «zezen ikuskizunei buruzko arautegiko 91. artikuluan jasotzen denez, 16 urtetik beherakoek ezin dute halakoetan parte hartu, eta hori jakinarazten zen ekitaldiaren baimenean».

Hala, 16 urte beteak zituenez, «lege hausterik ez dago», argitu zuen Rabadek. Bestalde, jazotakoari buruzko polizia atestatuaren zain daudela adierazi zuen. Bitartean, foru poliziak arduratuko dira gertatutakoa ikertzeaz.