Azken hamarkadetan izandako gizarte aldaketek bizi-itxaropena izugarri handitzea eragin dute, eta, ondorioz, zahartzaroa herritarren kezka iturri nagusienetakoa bilakatu da. Arantza Iturbe eta Agurtzane Intxaurragak kezka hori hartu zuten ardatz «Aitarekin bidaian» antzezlana idazteko. Elkarrekin idazten duten laugarren lana da, eta argi erakutsi dute bizipen propioetan oinarritu direla.

Hika Teatroak gai ugari jorratu ditu 1990. urtean sortu zenetik; «Ai, ama!» ikuskizunean, adibidez, amatasunaz aritu ziren. «Orain dela hiru urte, ordea, Arantxa eta biok elkartu eta gure guraso eta aiton-amonen inguruan kezka ugari genituela konturatu ginen», azaldu du Agurtzanek. Hori ikusita, eta herritarren zahartzea gero eta arazo «potoloago» dela jakinda, auzia lantzea erabaki zuten. Hori izan zen, hain zuzen ere, gaur oholtza gainean ikusi ahal izango dugun «Aitarekin bidaian» lanaren iturburua.

Antzezlanean elkarrekin bizitzera behartuta dauden aita-semeak aurkituko ditugu. Aita gaixo dago eta, ondorioz, buruak beste mundu batzuetara ihes egiten dio maiz. Semea, bere aldetik, amari hil aurretik agindutakoa bete eta aita zaintzen ahaleginduko da. Oztopo ugari aurkituko dituzte bidean. Lehenik eta behin, belaunaldi arteko inkomunikazioari egin beharko diote aurre, ama baitzen bien arteko zubia hil artean. Semeak, gainera, garai zailak bizi ditu lanean.

Muturreko bi pertsonaia eraiki dituztela onartu du Agurtzane Intxaurraga zuzendariak. Aita ameslariaren parez pare erabat praktikoa den semea jarri dute. Hala, zahartzaroari lotutako gaixotasunak jorratzeaz gain, komunikazioaren arazoa ere landu nahi izan dute. Bide batez, egoera mingarri batean itxaropenari ateak ere ireki nahi izan dizkiote; nahi izanez gero, bi pertsonen arteko hurbilketa beti eman daitekeela nabarmendu nahi izan dute, «oso zaila izan arren».

Antzezlanari gorputz emateko bi aktore ezagun aukeratu dituzte: Joseba Apaolaza eta Jose Ramon Soroiz. Jabier Muguruza musikariak ere parte hartzen du lanean bere akordeoiarekin. Zuzeneko musika eskaintzeaz gain, aitaren alter ego-a ere antzezten du Muguruzak; aitak ametsetan izan nahiko lukeen pertsona da, hain zuzen ere.

Aktoreak, «bermea»

Agurtzane Intxaurragak onartu duenez, Joseba Apaolaza, Jose Ramon Soroiz eta Jabier Muguruza bezalako profesionalekin lan egitea «bermea» izan da. Programatzaileek ere hala uste dutela dirudi, hurrengo hileko agenda bete-beteta baitute. Hala, hiru urteko geldialdiaren ostean, lanez lepo izango dira Hika Teatroa konpainiako kideak beraien itzuleran. «Arnasa sakon hartu dugu eta berriz ere bideari ekiteko prest gaude», nabarmendu dute. Gainera, «arreta merezi duen proiektua» egin dutela uste dute. Aurreko astean antzeztu zuten lehen aldiz «Aitarekin bidaian» Durangon eta, zuzendariak azaldutakoaren arabera, harrera ona jaso zuten: «Lana gogorra baina oso ona zela esan ziguten ikusleek».

Antzezlanak izan dezakeen arrakastaren gakoa ez dago aktoreen izen eta lan onean bakarrik. Izan ere, Hika Teatroa konpainiakoen ustez, «zoritzarrez», jorratzen dutena gai oso arrunt eta zabaldua da egun, eta, hortaz, erraza da jendeak antzezlanarekin bat egitea.