Berak sarri onartu bezala Retegi abizena bizkarrean eramateak kalte egin dion arren, Julen Retegik ia dena dauka bere aita Juliani eskertzeko pilota munduan eta esker opari polit bat egin diezaioke asteburu honetan Labriten, kaiolan duen garaipen errekorrak berea izaten jarrai dezan, nahiz eta iaztik Aimar Olaizolarekin partekatu behar duen. Bosgarren txapela janztea da goizuetarrak aurtengo ediziorako jarri duen helburua eta Eratsungo maisu handiaren semea izango da bide horretan gainditu beharreko lehen oztopoa.

Txapelketa guztietan egin duen bezala, atzo ere alboan izan zuen aita Julen Retegik Labriten egindako pilota aukeraketan. Final-laurdenetan parte hartuko duen pilotaritik gazteena izanda, primeran datorzkio pilotaren sekretu guztiak dakizkien aitaren gomendioak erronka zail honi ekiteko.

Hiru urte zituenetik ikusi zizkion Julianek Juleni pilotan gora egiteko dohainak eta gaur egun ere, askoren ustez aurrelariaren bilakaera uste baino motelagoa izan den arren, aitak ez du semeak gora egingo duen inolako zalantzarik. Honen inguruan galdetuta, Retegi II.ak beti gogoratzen du berak ere 25 urte bete arte ez zuela ezer irabazi eta semeari ikaragarrizko presioa sortzen diotela horrelako komentarioek.

Irabazle sena

Ahalmen guztien gainetik, berezkoa zuen irabazle sena izan zen Julian Retegi historiako pilotaririk onena bilakatu zuen sekretua eta Julenek ere hortik apur bat baduela erakutsi zuen atzoko Labriteko ekitaldian.

Aspeko aurrelariak badaki pronostiko guztietan Aimar Olaizolak faborito garbi gisa irtengo duela, baina bere aukeretan konfiantza handia dauka. «Nire aukeretan sinistu beharra daukat. Aldez aurretik galtzaile irteteko, zertarako partidara etorri? Horretarako hobe etxean geratzea. Nik susto bat eman nahi diot, eta irabazten ahalegindu gutxienez. Ni neure jokoa egitera irtengo naiz eta Alcorconek Kopan eman dion belarrondokoa bezala, edozer gauza gerta daiteke», adierazi zuen.

Adierazpen honetaz gain, oso aitarena den ausardia ere erakutsi zuen, egungo kaiolako txapeldunari irabazteko zer egin behar duen galdetu ziotenean. «Nik inoiz ez dut partidetara estrategia bat eramaten, gauzak uste bezala irteten ez zaizkizunean eskema guztiak hausten zaizkizu-eta. Momentuan momentukoa egin eta inprobisatzea nahiago izaten dut».

Hori bai, garbi dauka Aimarrengandik zerk ematen dion beldurrik gehien. «Gantxoa da Aimarren armarik eraginkorrena. Ondo errestatu ezean, Olaizola II.ak sake errestoan min ikaragarria egiten dizu».

Julen Retegi Olaetxea eta Patxi Ruizi irabaztetik datorren bitartean, larunbatekoa izango da Aimar Olaizolarentzat aurtengo lehen partida lau eta erdiko txapelketa honetan, eta horrek beti sortzen die pilotariei halako beldur bat, nahiz eta iazko egoerarekin alderatuta askoz hobeto heltzen den. Iaz txapelketan parte-hartzeari muzin egitekotan egon zen lesio baten erruz, baina Tolosan Koka gainditu ostean, gorantz egin zuen etengabe eta txapela janztea lortu zuen. Aurten, alde horretatik, ez du inolako beldurrik, eta Julen Retegi da bere kezka nagusia.

«Irabazteko oso pilotari zaila da. Aurten bi partida irabazi ditu eta iaz Barriolari irabaztetik gertu egon zen. Botera ondo moldatzen da eta distantziara bikain moldatzen da. Partida borrokatua izango da».