GARA > Idatzia > Kultura

BEC, inoiz baino ederragoa bertsozaleen uholdeari ongietorria egiteko

Kopuruak ez dira nolanahikoak: 200 pertsonatik gora lanean, 150 kazetari -Euskal Herrikoak zein atzerrikoak-, 2.900 pertsonentzat autobus zerbitzua, 1.600 bertsozalerentzat bazkaria... Bertsolari Txapelketaren inguruko zenbaki batzuk besterik ez dira. Bart goizaldeko hiruretatik etenik gabe aritu dira 30 bat boluntario, aulkiak jartzen dituen enpresako langileekin batera, 09.30erako BEC inoiz baino ederrago egon dadin. Bertso festa hastera doa!

p048_f01.jpg

Xole ARAMENDI | BARAKALDO

«Hik lan eta nik jai» zioen Tapia eta Leturiaren kantu ezagunak. Aurkakoa gertatu zaie Bertsolari Elkarteko kide askori: besteek gozatzeko lan egin beharra. «Guk lan eta zuek jai».

Bilbao Basket eta Unicajak atzo BECen jokatu zuten partidak planak dezente aldarazi dizkie. «Joan den ostegunean hasi ginen muntaketa lanean, goizeko zazpietan. Saskibaloiko kantxak bertso finalak baino toki gutxiago hartzen duenez, aukera izan dugu teloi beltz baten atzean agertokia muntatzeko. Baita han bertan ikusiko diren hiru pantailak ere», kontatu zuen Jon Agirresarobek, txapelketaren koordinatzaileak.

Villabonan harrapatu genuen, Mintzola etxean. Saskibaloi partida amaitu arte ezin aulkiak jartzen hasi eta beste zereginetan zebiltzan elkartekoak. «Komunikazioko azken lanak, lan taldeak errepasatu, autobusak bideratu... Denak elkarrekin afaltzekoak ziren, 20.00etan, Barakaldo inguruan. «Ondoren lo pixka bat egiten saiatu eta bakoitza berera agindutako orduan», esan zuen.

Gaueko hamarrak pasa bukatu zen partida eta dena hustu eta garbitu ondoren, bart, goizaldeko hiruretan, hasi dira aulkiak jartzen. Elkarteko kideez, borondatez aritu direnak, eta profesionalez osatutako lantaldea. 3.500 aulki jarri dituzte kantxan, harmailetakoak prest zeuden eta. Horrez gain, eszenatokiari azken ukituak eman, kartelak eskegi, sarrera puntuak egokitu... Helburua, 09.30ean ateak irekitzeko dena prest egotea. Orotara 30 boluntario inguru aritu dira gaueko ordu txikietan, txandaka hasita. Gaur, berriz, 120 boluntario eta beste 100 profesional ibiliko dira guztira bat eta bestea egiten.

Ia begirik bildu gabe

Begiak askorik bildu gabe dabiltza batzuk. «Bart (ostirala) ez dugu lo askorik egin eta gaur ere ez. Berezko tentsioari presak eragindakoa gehitzen zaio eta oso txarra da gestionatzeko. Baina ez zegoen beste aukerarik. Harrigarria da zenbat gauza elkartzen diren, txikiak zein handiak», azaldu zuen atzo eguerdian Agirresarobek, sakelako telefonoa jo eta jo ari zitzaiola. Atzo, zorionez, gehienak txikiak ziren.

Antolakuntza taldeko kide gehienentzat lehen esperientzia da. «Oso talde berria gara», adierazi zuen Agirresarobek. Oso urduri bizi izan dituzte finalaren aurreko orduak. «Tentsio handia daukagu», aitortu zuen. Villabonan harrapatu genuen, Mintzolan. Antolatzaileak han-hemenka banatuta zeuden, azken prestakizunetan. Batzuk BECen bertan eta besteak Durangon, Bizkaiko elkartearen egoitzan.

Garraioari dagokionez, autobusez 2.900 pertsona iritsiko dira Barakaldora. «BECera joateko autobusa da bide onena», Agirresaroberen esanetan. Beste askok metro zerbitzuaren aukera egingo du. «Ohiko zerbitzua egongo da. Sarri iristen dira trenak», adierazi zuen.

Izango da Barakaldorainoko bidea autoz egitea erabaki duenik ere. Aparkatzeko arazorik izatea ez da espero. «Ondo diseinatuta dago eta guztientzat egongo da tokia», zioen.

Egunari aurre egiteko urdaila zaintzea ere komeni. Bazkaltzeko bi areto egokitu dituzte Bilbao Exhibition Center gunean bertan: bat aurrez janaria enkargatu duten 1.600 pertsonentzat eta bestea norbere kasa jan nahi dutenentzat.

Bertsolaritzak, eta batez ere, txapelketa nagusiaren finalak, pertsona askoren arreta pizten du. Baita atzerrian ere. Gaurkoan BECen bertsolarien jardunari adi-adi egongo direnen artean John Foley, «Oral tradition» aldizkariko editorea aipa daiteke. Missouriko Unibertsitatean ahozkotasuna ikertzen egiten du lan.

Gonbidatu gehiago ere izango dira, ahozkotasunaren alorrean lanean ari direnak, baita beste herrialdeetako inprobisatzaileak ere. «Ahozkotasuna masa fenomeno bihurtzeak harritu egiten ditu. Denek etorri nahi izaten dute», kontatu zuen.

Aurten bada berritasunik. Adituentzat interpretazio zerbitzua gaztelaniaz jartzekoak ziren, aurreko txapelketetan bezala, baina gonbidatu ia denek katalanez dakitenez hizkuntza honetara egingo da itzulpena.

Hedabideei dagokienez, 150 kazetari daude akreditatuta. Telebistaz, irratiz zein Internet bidez jarraitu ahal izango da finala. «Italiatik hiru pertsonako taldea dator finalaren gaineko dokumentala grabatzera. Eta estatu frantsesetik beste pertsona bat iritsiko da bertsolaritzaz prestatzen ari den proiektua osatzeko asmoz», kontatu zuen Izaskun Ellakuriagak, txapelketako komunikazio arduradunak.

TENTSIOA

«Berezko tentsioari presak eragindakoa gehitzen zaio eta oso txarra da gestionatzeko. Baina ez zegoen beste aukerarik. Harrigarria da zenbat gauza elkartzen diren, txikiak zein handiak», azaldu zuen Jon Agirresarobek, sakelako telefonoa jo eta jo ari zitzaiola. Atzokoak txikiak ziren.

Imprimatu 
Gehitu artikuloa: Delicious Zabaldu
Igo